UMLU UBUYE NESINGILI EHLABAHLOSILE
UKHUZA ibuya ngemuva kokunyamalala isikhathi eside emculweni umlu, abaningi abamkhumbula ngengoma esihloko sithi, "I’ll Be There", ayeyishaya nodj Ganyani okuyiyona eyamenza wagqama.
Umlu Mthethwa ( osesithombeni) ongowokuzalwa emlazi, uke wazinza phesheya kwezilwandle. Uthi ngesikhathi enyamalele uthole ithuba eliyingqayizivele lokusebenza no-ar Rahman oseke waprojusela iqembu ipussycat Dolls, nopj Morton oke waphrojusela umariah Carey, u-india Arie, ijagged Edge nabanye abaculi.
Ekhumbula le ngoma eyamgqamisa uthe: “Leya ngoma yaba nkulu kakhulu ngendlela nami engangingayilindele. Ngaba nezinselelo eziningi, phakathi kwazo okwakuwukuthola inkampani yokuqopha.
"Kahle hle bengidinga isikhathi esenele sokuba ngizithole ngoba ngemuva kwaleya ngoma kwakubalulekile ukuba ngihambe ngegiya elifanayo emculweni,” kuchaza umlu.
Kumanje unengoma entsha ethi, "I need to Know" asebenze kuyona nodj Chase esidlalwa nasemisakazweni. Uthi umatasa nokumaketha le single yakhe nokupholisha i- album azoyikhipha maduze okuzobe sekungeyesibili.
Echaza ngale album ayipholishayo uthe: “Ingohambo lwami, konke okuthinta ubumina. Ngiyinike sonke isikhathi sami njengoba ngiyenze kade kuvalwe izwe. Iqukethe izinhlobo ezahlukene zomculo. Angifunanga ukuzivalela entweni eyodwa yize ngiwumuntu we- soul. Kwenye ungazithola udansa, uphinde uzithole usujulile futhi,” kuchaza yena.
Uke waba semjikelezweni welion King, elondon. Uke wasebenza nabaculi abahlonishwayo okubalwa umiriam Makeba, urebecca Malope nosibongie Khumalo obefihlwa ngempelasonto edlule, athi ufunde lukhulu kuyena.
“Ngikhumbula ngihlangana naye okokuqala ngiyoba i- back up singer kwi- album yakhe ethi, "The Quest". Ngangithathekile yindlela ayesebenza ngayo. Uwumuntu obewazi ngendlela exakile umculo, aye kwi- instrument ngayinye aze athole le nto ayifunayo.
"Kuningi kakhulu engikufundile kuye ngokuziphatha nangokudidiyelwa komculo ukuze uhlangane ube yinto ewulozolo,” esho. Umlu uthi angakujabulela ukusebenza noMbuso Khoza, Afrotraction, ubrian Temba, ulira nozonke. tzondi@ ilanganews. co.za