AMAGALELO AKHE OKUTHUTHUKISA ABOMDABU
IMINYAKA ENGU-150 KWABA KHONA UDKT JL DUBE ISHO LUKHULU KITHINA ESIPHILA MANJE.
MHLELI, nabafundi kwelikamafukuzel’ onjengohlanya, njengoMphathiswa wezobuciko namaSiko esifundazweni ikwazuluNatal, nentokazi ewumsinsi wokuzimilela kuleli likamthaniya, ngicela ungivumele ngithathe usiba ngigcobhoze kwingcomboyi maqede ngiklwebhe kuleli khasi ngithi qaphu qaphu ngengqalabutho engubaba ujohn Dube esigubha iminyaka eyikhulu namashumi amahlanu (150) yanyathela kuleli elimagade ahlabayo.
Ubaba udkt John Langalibalele Dube, umafukuzela umfokaNgcobo wokhalo lwamakhosi asemaqadini, omqhawe nodabeka walandulela lelizwe kuyona le nganya esikuyo ziyishumi nanye, eminyakeni engamashumi ayisikhombisa nanhlanu (75) edlule (11 February 1946), ekubeni wayezalwe ngayo futhi le nyanga kanhlolanja.
Kulo nyaka simkhumbula njengoba kuphele iminyaka eli-150 azalwa.
Njengomphathiswa wezobuciko namasiko kungihlaba umxhwele ukuthi umengameli wezwe, umnu Matamela Ramaphosa uqoke okadube njengelinye lamaqhawe okufanele siqhakambise imisebenzi yalo kulo nyaka kanye nomama Charlotte Maxeke.
Kepha ngicela ukugxila kuleli vulandlela elaba ngumengameli wokuqala wombutho wenkululeko yomuntu omnyama, i-african National Congress (ANC), kusukela ngo-1912 kuya ku-1917 ngesikhathi usabizwa ngesouth African Native National Congress (SANNC), ubaba ujohn Dube.
Umafukuzela wayesezingeni lokuba yingcithabuchopho ngoba wayenguthisha, umhleli wezindaba, umbhali aphinde abe nothando lomculo wamakhwaya.
Ngizwa ngivukwa wuhlevane nomunyu uma ngicabanga imisebenzi kababa udube okubalwa kuyona ukusungula iphephandaba lesizwe ILANGA Lasenatali ngoba wayebona ukuthi akekho ozoxoxela abantu abamnyama izindaba ezithinta bona ngolimi lwabo lwebele.
Kuphinde kuphakame umoya uma ngicabanga ukuthi leli phephandaba engitshikizisa usiba kulo namhlanje yinkundla yona kanye esayakhelwa ngumafukuzela uqobo.
Nakuba umafukuzela sekuphele iminyaka engama-75 asishiya, siyaziqhenya ngamagalelo akhe okuthuthukisa impilo yabomdabu. Uma ngilisingisa ngasenyakatho yetheku, nanamhlanje zisamile izindonga zesikole asakha uhlange esika emhlabeni wakwabo ngo-1901, akhela isizwe ngokubambisana nobuholi basemaqadini kanye nomama wekhaya unokuthela Dube. Umlando usixoxela ukuthi umfokadube ubethi ematasa efundisa ukwakha izicathulo, umama unokuthela ebe ematasa namantombazane benza umsebenzi wezandla njengokuthunga.
Yilo mholi owaba nguthisha, waba ngumbhidisi nomqambi wezingoma, abe ngumkhulumeli wabantu, enjalo nje eyisifundiswa esivunywe umhlaba wonke, saze savunywa ngisho ngumnu William Campbell, ingisi elalilethelwe ukuzokwelusa abantu abamnyama kuleli likamthaniya.
Uhlange luyinational Heritage Site, kanti nonyaka lutonyu-lwe ohlelweni lokuthi lungaba I-UNESCO World Heritage Site.
Izinselelo ezazibhekene nesizwe esimnyama ngaleyo mihla, kwakubalwa ukwephucwa amalungelo obunikazi bomhlaba wokhokho, yimithetho efana neLand Act of 1913, eyayiklama kabusha imingcele ezweni lokhokho.
Abelungu babengasinike thuba kodwa ngobuhlakani nobuholi bobaba udube, sakwazi ukuba sifunde futhi sizabalaze saze sawelela enkululekweni.
Kulo nyaka umnyango wezobuciko namasiko uhlele izinhlelo zokuhlonipha leli qhawe.
Ngivumele mhleli ngikuveze ukuthi kungaphela amakhasi uma siloba amagalelo aleli qhawe esigubha iminyaka eyikhulu namashumi amahlanu lanya-thela emhlabeni njengoba namhlanje sinehubo lesizwe elaqanjwa ngu-enoch Sontonga, elithi, "Nkosi Sikelel’ Afrika, elenziwa ngubaba udube esikoleni Ohlange laba wumkhuleko omkhulu wesikole laze laduma kulo lonke izwe.
Namhlanje iningizimu Afrika nomhlaba wonke usuqede unyaka golokoqo kuwongaphansi ongaphezulu, kulwiwa nokhuvethe olubizwa NGECOVID-19.
Lolu khuvethe ludla sitshodo ludla fumuka, lushaya icole luvale ngehlahla emndenini kusale kulenga ingidi, ungafunga ukuthi bekulwa impi yomhlaba.
Kukulesi sikhathi-ke lapho kufanele sihabule ebuhlakanini esabushiyelwa ngubaba udube ngokuthi, sifunde sijule ngezinselelo esibhekene nazo ukuze sikwazi ukuzinqoba.
Nakuba ayeyikholwa umafukuzela, kodwa akazange athi abantu mabadle umthandazo njengoba wayegqugquzela ukuzibambela ngezandla emsebenzini, nathi-ke masifunde ukusukuma sakhe.
Siyisifundazwe esinenhlanhla ngokuba nomlando obanzi kangaka kanye namaqhawe amangaka. Siyafisa futhi ukuba izimfundiso zikadube zifinyelele kwizizukulwane ngezizukulwane.
Njengodube eqhakambisa ulwimi lwakhe lwesizulu ngokubhala izincwadi kanye nokusungula iphephandaba ILANGA, nathi masichazele isizwe ngolimi lwethu ukuthi lesi sifo esibhekene naso sihamba kanjani futhi singavinjwa kanjani.
Le nyanga kanhlolanja iphinde ibe yinyanga yokutusa nokuba negqabho ngolwimi lwebele emhlabeni, esikugubha njalo ngomhla zingamashumi amabili nambili (22 February).
Njengezimfundiso nezenzo zikababa udube, masiqhubeke nokusondeza ukukhanya kwemfundo esizweni.
Nalo leli phephanda likamafukuzela maliqhubeke nokubika ngolimi lwethu ukuze abafundi bakleze kogwansile, babheme bakholwe ngolwimi lomdabu.
Siyabonga.
Kuloba UMEC Hlengiwe Mavimbela wezobuciko amasiko, ezemidlalo nokungcebeleka Kwazulu-natal.