Kuyajabulisa okwe-arrows nosuthu kwidstv Premiership
IYAJABULISA indlela aqale ngayo amakilabhu asethekwini emidlalweni yedstv Premiership njengoba ingekho esengcupheni yokugencwa yizembe ngokusongwa kwesizini.
Amazulu FC nelamontville Golden Arrows basalokhu beqhubekile nokwenza kahle emidlalweni yepremiership.
Yize sikujabulela lokho kodwa akwehli kahle ukuthi imaritzburg United ibalwa namakilabhu asengozini yokudliwa yizembe.
Amaphuzu aseqoqwe wusuthu ne-arrows aqinisekisa ukuthi mancane amathuba okuthi babonakale kwigladafrica
Championship ngesizini ezayo. Kuyinto engasavamisile ukubona usuthu lunqoba imidlalo emine ilandelana.
Lokhu nje kukodwa kuyizinkomba yokuthi izinto zihamba kahle.
Okuhle ngala makilabhu wukuthi acijwa ngabaqeqeshi bakuleli, futhi abalidlalile ibhola ezingeni elikhokhelayo.
I-arrows ilolongwa ngumandla Ncikazi kanti usuthu lucijwa nguBenni Mccarthy bobabili ababonakala benobudlelwano obuhle kakhulu nabadlali babo.
Laba baqeqeshi bahlale bebavikela njalo abadlali babo okwenza nabo bakuthakasele ukubasebenzela.
Womabili la makilabhu alwazi kahle usizi lokudlala ehlathini njengoba eke agencwa yizembe phambilini.
Usuthu kuze kwadingeka ukuthi luthenge ilungelo lethanda Royal Zulu ukunyukela kwi- premiership kwazise beluhluleka ukunyuka ngezikhwepha zalo.
Impilo inzima kumakilabhu egladafrica Championship njengoba incane imali etholwa kulesi sigaba zinyanga zonke ekubeni ikhiwa ngamafosholo kwi- premiership.
I-arrows yona ibe nenhlanhla yokusheshe inyukele esigabeni esikhulu isizwa ngushaun Bartlett obengumqeqeshi oshenxisiwe kulo msebenzi.
Kuyajabulisa ukuthi abanikazi bamakilabhu akwazulu-natal basakwazi ukuqhubeka nebhizinisi likanobhutshuzwayo yize umnotho wezwe ufadabala ngenxa yokubhilita kwecovid-19 esalokhu iqhubeke njalo nokudlula nemiphefumulo.
Sinzima isimo esibhekene nabanikazi bamakilabhu njengoba bengasayitholi imali yokuthengwa kwamathikithi.
Iteam of Choice nje, iphumele obala ngokuthi idayisele imamelodi Sundowns urushine De Reuck ngoba ibhekene nesimo esinzima kwezomnotho.
Le kilabhu beyenza imali ebhekile emidlalweni yasekhaya njengoba kuphuma nesinedolo nxa idlala ngolwesihlanu ebusuku.
Ishayeka kanzima njengoba abalandeli bengakavumeleki ukubuyela ezinkundleni.
Amakilabhu ayadinga ukubonelelwa wuhulumeni ngemali ngoba nawo abamba iqhaza elimqoka ekufukuleni umnotho wezwe okhahlamezeke kakhulu emuva kokubheduka kwecovid-19 emise kabi umhlaba wonke.