Uphumela obala ngekusasa osuthwini
Inkontileka iyaphela uma kusongwa isizini
UMDLALI wamazulu FC okade ayewa evuka nale kilabhu ibhekene nezivuvaba ucacisa ngekusasa lakhe njengoba inkontileka yakhe iphela.
Usuthu luzobhekana neswallows FC kowedstv Premiership namuhla ngesonto ngo-15h30 edobsonville Stadium, esoweto. Usuthu luya kulo mdlalo nje, lusefomini njengoba lusoconga kwasani ephambi kwalo.
Nokho abalandeli bale kilabhu banemibuzo ngekusasa likasiyabonga “Nqaba” Mbatha ongunozinti njengoba inkontileka yakhe iphela uma kusongwa isizini.
Abanye bashayela ngqo leli phephandaba babuze ukuthi kwenzakalani ngalo mdlali njengoba bengabikelwa lutho kube kunamahlebezi athi angase ahambe.
Lo mdlali engxoxweni abe nayo naleli phephandaba, ulicacisele ngesimo sakhe kule kilabhu.
“Engicela ukuqale ngikucacise wukuthi Amazulu ngiyawathanda futhi kuyisifiso sami ukuqhubeka nokuwadlalela. Kula masizini amane esingiwahlale kuwo ngiphatheke kahle. Izingxoxo ngekusasa lami zike zaqala zaphinde zama. Umengameli wekilabhu (usandile Zungu) ungiyalele ukuba ngilinde kancane. Ngikholwa wukuthi sizofika isikhathi lapho izingxoxo zizoqhubeka khona,” kusho umbatha.
Ephawula ngomdlalo weswallows, uthi bazimisele ngokuyolephula irekhodi layo lokungehlulwa.
“Amalungiselelo ahambe kahle, wonke umuntu ukulangazelele ukuba yingxenye yalo mdlalo ikakhulukazi njengoba ikilabhu yenza kahle.
"Njengoba sesiwina nje, amakilabhu asesibuka ngelinye iso, ayasihlelela. Kodwa-ke inhloso yethu wukuyophula irekhodi labo lokungehlulwa. Siyazi kungenzeka lokho yize kuzoba nzima,” kusho umbatha.
Limbuza leli phephandaba ukuthi ngabe useliphuciwe yini ibhande lobukaputeni njengoba emdlalweni wenedbank Cup abahlule kuwona omkhaya ilamontville Golden Arrows beligqokwe ngumbongeni Gumede ekubeni ebekhona ezintini, uthe:
“Ngiyasiqonda isimo, vele kangidlali njalo, ngakho-ke kufanele ibhande lihlale kumuntu odlala njalo.
“Kanginayo nencane inkinga ngebhande ngoba nami ngalithatha kumuntu, kakufanele uma sekwenzeka kimina kube sengathi kwenziwa into embi.
"Indlela ongena ngayo yindlela ophuma ngayo. Into emqoka wukusebenzela ikilabhu ngobuqotho kakukhathalekile ukuthi ngubani ukaputeni. Njengoba silapha nje, sizoqinisekisa ukuthi izifiso zabaphathi bekilabhu nabalandeli ziyafezeka.”
Imidlalo yedstv Premiership ehleliwe imi kanje:NAMUHLA NGESONTO Evolkswagen Dobsonville: Swallows FC vs Amazulu FC 15h30.
NGOLWESITHATHU E-FNB Stadium: Kaizer Chiefs vs Amazulu 15h00.
Eloftus Versfeld: Mamelodi Sundowns vs Baroka 17h00.
NGOMGQIBELO
E-FNB Stadium: Kaizer Chiefs vs Supersport United 15h00.
Enelson Mandela Bay: Chippa United vs TS Galaxy 15h30.
Epeter Mokaba: Baroka vs Black Leopards 17h00.