I-SABC iphika ingcindezi yabalaleli ngotshatha
Uselwelwa ngabathile ezinkundleni zokuxhumana
NHLANGANO yezokusakaza kuleli, ISABC ichitha indaba yohlu lwezikhalo ( petition) zabalaleli bokhozi FM ngodaba lukakhathide “Tshatha” Ngobe ( osesithombeni), ithi ayinalwazi lwalolo hlu.
ILANGA Langesonto lithole ukuthi kunabalaleli asebehlanganise uhlu lwezikhalo oselusayinwe ngabangaphezulu kuka-500, obelufakwe online, abazama ukufaka ngalo ingcindezi KWISABC ngokumiswa emoyeni kukatshatha.
Laba balaleli bafuna ukuba lo msakazi osamisiwe emoyeni abuyiselwe ezinhlelweni abevele ezenza phambilini uma sesiphelile isigwebo sakhe. Lolu hlu luqhamuka ngemuva kwamahlebezi athi lo msakazi angase ancishiselwe izinsuku zokusakaza (uma kwenzeka ebuyiselwa emoyeni).
Ngaphambi kokumiswa kwakhe utshatha ubeshayela uhlelo lwasekuseni phakathi nezinsuku, oluthi, "Isidlo Sasekuseni", abelwenza nonongcebo Mckenzie.
Ubeshayela noluthi, "Sigiya ngengoma", abelwenza nozimiphi “Zimdollar” Biyela. Lokhu kusho ukuthi lo msakazi ubengena emoyeni izinsuku eziyisithupha.
Ukhozi luzoba nezinguquko zaminyaka yonke uma kuqala umbasa (April), okuyinyanga okubhekwe ukuba abuyele ngayo emsebenzini utshatha.
Ukumiswa kukatshatha emoyeni kulandela ukuphawula kwakhe enkundleni yokuxhumana ifacebook, ngodaba oluthinta ingoma eyahlukanisa unyaka ngo-2005.
Ephawula kule nkundla wathi ngalowo nyaka kwakumele kube yingoma kashwi nomtekhala ethi, "Ngafa" eyahlukanisa unyaka, kodwa kwashintshwa ngomzuzu wokugcina, kwafakwa eyemalaika ethi, "Destiny".
Emuva kwesikhashana emisiwe, wayalelwa ukuba awuhoxise lo mbhalo futhi axolise, nebala wenza kanjalo.
Umkhulumeli
WESABC obambile ummoni Seapolela, uthe beyinhlangano yezokusakaza abanalo ulwazi lwalolu hlu.
Uthe ukhozi FM luzoqhuba izinhlelo zalo zokuqinisekisa ukusebenza kwesiteshi bese lwenza izinguquko ezifanele uma kunesidingo.
Uthe bazomemezela ngezinguquko ngokuhamba kwesikhathi uma konke sekuphothuliwe futhi ngesikhathi esifanele.
Uxolani Mcineka oyisikhulu esiphezulu somcimbi kamaskandi omkhulukazi obanjwa minyaka yonke ethekwini, impucuzeko, uchaze udaba lukatshatha nokhozi njengolufana nolwabantu abaganene, olungadingi abantu bangaphandle.
Uthe bona beyimpucuzeko bayafisa ukuthi abathintekayo balungise lolu daba ngendlela ababona lufanele luxazululwe ngayo. Uthe bona ngeke bangene ngoba banothando lwabo bobabili, ukhozi notshatha.