Uthinte ubuqotho nokuvuswa komnotho
I
GXILE ezinhlelweni zokuvuselelwa komnotho nokwakha amathuba emisebenzi inkulumo yesifundazwe kandunankulu wakwazulu-natal, umnu Sihle Zikalala ( osesitho
mbeni), ayethule ngolwesihlanu esishayamthetho, emgungundlovu.
Umnu Zikalala uthe ngemuva komhlangano welekgotla, bavumelane ngokuthi kulo nyaka bazogxila ezintweni eziyisihlanu ezibalulekile.
Phakathi kwazo ubale ukuqinisa impi yokulwa necoronavirus, ukuvuselela izinhlelo zokuthuthukiswa komnotho nokwakha amathuba emisebenzi, ukubuyisana emphakathini nokulwa nobugebengu nenkohlakalo, ukusabalalisa izidingo kubantu ikakhulukazi amanzi, nokwakha isifundazwe esikulungele ukuthuthuka futhi esiqotho.
Uthi nakuba unyaka u-2020 ube nezingqinamba kwezemisebenzi, kodwa imikhakha ethile okubalwa owokwakha izimpahla zezimoto nowezolimo ikwazile ukugcina imisebenzi, futhi kwasunguleka namanye amathuba.
Ubalule izinhlelo ezahlukene abanazo bewuhulumeni wesifundazwe zokuqinisekisa ukwakha amathuba emisebenzi, nokuthuthukisa umnotho wesifundazwe. Uthe nakuba ucwaningo lwakamuva lwequarterly Labour Force Survey, luveze ukuthi ikwazulu-natal ilahlekelwe ngamathuba emisebenzi awu-210 000, kodwa isifundazwe sikwazile ukwakha awu-66 000 ngesikhathi esifanayo.
Uthe uhulumeni uzosebenzisana nosomabhizinisi ikakhulukazi labo abashayekile ukuze kubonakale ukuthi bangasizakala kanjani ezinhlelweni ezikhona zesifundazwe.
Uphawu lena ngohlelo lokusatshalaliswa komgomo wecovid-19, athe luqhuba kahle njengoba kubikwa ukuthi sebebalelwa ku-33 399 asebe-bhalisele ukugonywa esigabeni sokuqala.
Uthe emigomweni engu-10 800 etholwe yisifundazwe, seziwu-7 337 izisebenzi zezempilo esezigonyiwe. Ukuze lesi sifundazwe sibe ngesiqotho, uthi bazoqinisa umkhankaso othi: “Ngenza okulungile noma kungaboni muntu.”
Uthe lo mkhankaso bazowuphusha kakhulu ungene kuzona zonke izisebenzi zikahulumeni nakwezinye izinhlaka zawo.
Uncome ikwazulu-natal ngokuba yisifundazwe sokuqala ukuphumela obala ngendlela imali esebenze ngayo ekuthengweni kwezimpahla zokuzivikela. Uthe embikweni kwavezwa lapho lungaqhutshwanga kahle uhlelo lokusetshenziswa kwemali, ongqongqoshe beminyango ethintekayo bazithatha nezinyathelo ezifanele.
Ngaphambi kokuqala inkulumo yakhe, umnu Zikalala uhloniphe isilo samazulu, ugoodwill Zwelithini, wabe esesifisela ukululama okusheshayo futhi wanxusa ukuba sibekwe emkhulekweni.