SIMANZONZO ISIMO KUSOSESHINI WAKWANONGOMA
SISAQHUBEKA nokubamanzonzo isimo kusoseshini wamatekisi wakwanongoma, inongoma Tax Association, njengoba ziqhubeka izigameko zokuhlaselwa kwamalungu awo.
Ezinsukwini ezimbalwa ezedlule kuhlaselwe umnu Elliot “Thintwa” Mthethwa (62) oyisekela likasihlalo walo sosesheni. Usinde ngokulambisa nabanye abehamba nabo emotweni ngesikhathi behlaselwa ngemvula yezinhlamvu.
Umnu Mthethwa uthi uyoyixoxela amagwababa echobana indaba emehlele ethatha uhambo nomndeni.
“Ngesonto benginendlela. Ngifonele umngani wami ngomgqibelo ebusuku ngimcela ukuba angitsheleke imoto ukuze ngiyisebenzise kulolu hambo lwami. Uvumile, ngayilanda ngahamba nayo yayolala ekhaya. Ekuseni ngesonto ngabo 3 sivukile namanye amalunga omndeni salungiselela ukuhamba. Imoto ibishayelwa wumfana wakithi.
“Sithe sisendleni eduze komhoshana omncane nje sezwa ukuqhuma kwesibhamu sidutshulwa, ngatshela lo mfana ukuthi siyadutshulwa. Imoto ibe zimbobo-mbobo kodwa sakwazi ukubaleka saphuma singenamyocu sobathathu ebesisemotweni. Imoto idubuleke esondweni langaphambili sabaleka ngayo injalo saze sayongena emtholampilo wendawo,” esho.
Kwenzeka lesi sigameko nje ILANGA Langesonto belishicilele udaba ngalo isonto, mayelana nezinkinga ezikhungethe lo soseshini. Ngalo futhi isonto bekungcwatshwa amalungu omndeni wakwankosi, umnu Ntshokovane Nkosi nomkakhe unonkululeko, abahlaselwe kubo badutshulwa, kanti umndeni usola izimpi zombango wasematekisini.
Ngolwesibili ISANTACO ngaphansi kwesiyingi izululand ibambe umhlangano ngenhloso yokuthola isisombululo ezinkingeni ezihaqe lo soseshini. Umnu Sibusiso Zwane WESANTACO ephawula ngalo mhlangano uthe: “Into esiyithole wukuthi amalungu kasoseshini asehlukene phakathi, sekuzwe kwachitheka negazi. Uma sekunjalo kusuke sekungaphezulu kwethu. Udaba siludlulisele ezingeni lesifundazwe.”
Usihlalo kasoseshini umnu Mnumzane Zakwe uthe uyalwazi udaba lokudutshulwa kwesekele lakhe.
hlongwaj@ilanganews.co.za