INJABULO KUPHUMELELA OKWAKULAHLWE ITHEMBA NGAYE
KUFEZEKE iphupho kubazali bomfundi ophila nokukhubazeka wasenewlands East, ethekwini, ophumelele kahle kakhulu kumatikuletsheni, phezu kokuba abazali bakhe babetshelwe ngodokotela ukuthi ngeke akwazi nhlobo ukufunda ezikoleni ezijwayelekile ngenxa yesimo sakhe sempilo.
Nakuba bathola lowo mbiko kodokotela ngesikhathi indodana yabo isafunda emabangeni aphansi, kodwa abazange badikibale, baqhubeka bayihambisa esikoleni.
Unkk Ntombifuthi Msomi, ongunina kabakithi Msomi (20), obefunda edurban High School (DHS), emusgrave, ethekwini, uthi ngesikhathi ethola imiphumela yendodana yakhe ufikelwe yizinyembezi, wakhumbula amazwi odokotela ababemtshela wona.
Uthi babethe akangazihluphi ngokuyiyisa ingane yakhe esikoleni esejwayelekile, kepha ayifake lapho izokwazi ukufunda imisebenzi yezandla ngoba ikhubazekile.
Uthi ukungadikibali nokungavumi ukuba ingane yakhe ithathwe njengekhubazekile, futhi engeke ikwazi ngisho ukufunda, kuthele izithelo ezinhle njengoba iphumelele phezu kwezimo ezinzima. Uyaziqhenya ngempumelelo yendodana yakhe
Elanda ngesimo sayo, uthi ibingafani nezinye izingane - iphuzile ngisho ukukhuluma.
“Uze waqala ukukhuluma eseneminyaka eyisithupha, nakhona ubesho igama elilodwa ngaleso sikhathi nokwenze ugrade R wawufunda iminyaka yaze yaba mithathu ngoba bengimshintshisa izikole, ngingasitholi abengakwazi ukufunda kahle kusona,” kusho yena.
Uthi uze wathola isikole esisePinetown, ibrowns, okuyisikole sezingane ezinokukhubazeka lapho efunde khona waze wayofika kwaGrade 6. Kulesi sikole yilapho athi umfana wakhe uthole khona ukwesekwa okufanelekile ngenxa yokuthi othisha bakhona bayaziqaphela izingane futhi kazibi ningi egunjini lokufundela ngalinye ukuze zikwazi ukufundiseka kahle.
“Kuthe eseyofunda ugrade 7 odokotela ababemhlola bavumelana ukuthi usekulungele ukuthi angangena esikoleni esijwayelekile ngoba ubebonakala engumfundi ozimisele,” kusho yena.
Uthi akufundile njengomzali wukubaluleka kokweseka umntwana ngokugcwele.
“Ukube ngamyekelela nje ngangalwa njengomzali wakhe, ngimkhombise ukuthi ngiyakholelwa kuye, ngabe kasikho lapha sikhona. Ngisho ekhaya abafowabo bayazi ukuthi kumele bameseke kunoma yini ayenzayo.
“Siyaziqhenya kakhulu ngaye futhi ngiyafisa ukuba abe yisibonelo nakwabanye abantwana abaphila nokukhubazeka,” kusho unkk Msomi.
Uveze ukuthi ngesikhathi indodana yakhe ibhala izivivinyo zaphakathi nonyaka uyise wayelaliswe esibhedlela exhunywe imishini, ehaqwe yicovid-19.
“Sonke lapha ekhaya sahaqeka nobekuyinto ebe nzima kakhulu ngoba bekufanele aphume kunjalo agadwe aye kobhala. Esikoleni ubehanjiswa ngumfowabo, kuthi uma eqeda ukubhala angene emotweni abuye ukuze angagcini esethelela abanye abafundi. Lesi kube yisikhathi esinzima kakhulu kodwa ukwazile ukubhekana nalobo bunzima, wakwazi ukwenza kahle ezifundweni zakhe,” kusho unkk Msomi.
Eziphawulela ubakithi uthe: “Ngiyazi ukuthi ezikhathini eziningi izingane ezikhubazekile kakulindelwe lutho olutheni kuzo, kunezinto ezithile okuthiwa kumele zizenze.
“Ngiyafisa ukuba nabanye abazali abanabantwana abakhubazekile ukuba babe ngumgogodla ezinganeni, bazeseke ngayo yonke indlela abangakwazi ukuzeseka ngayo. Iphupho lami elikhulu wukuba ngumsakazi kwezemidlalo ngelinye ilanga ( sports commentator) ngoba yikhona engikwazi ukukwenza kahle.”
Uthi uzimisele ngokwenza izifundo zesports Management e-university of Johannesburg (UJ). Esikoleni uthi ubedlala ibhola likanobhutshuzwayo, yi- rugby, yibasketball ne- hockey. nonhlakaniphos@ilanganews.co.za