Abakwalongcast bahlobana nabesizwe samazulu
EZINYANGENI ezimbalwa ezedlule iphephandaba ILANGA elinguzakwabo WELANGA Langesonto, livezele abafundi kafushane ngokunye obekwenzeka ngesikhathi isilo ucetshwayo siboshiwe ecape Town, okuwuhlangothi lomlando okungabikiwe kakhulu ngalo.
Lo mlando ILANGA laliwethekele emazwini esendlalelo sencwadi esihloko sithi, “King Cetywayo Zulu Dictionary”, elotshwe ngumnu Robert “Lubhembedu” Samuelson owayengomunye wotolika besilo ucetshwayo, sona esasimbiza ngolobede.
Namuhla sibheka umlando nolibo lomndeni kamnu Henry William Longcast, naye owaba wutolika wesilo umpande nomntwana ucetshwayo, kanjalo nangokuxhumana kwakhe nabantu bakwazulu njengoba silandiswa ngunkk Ingrid Margaret Matilda Filand (umacollins) oyisizukulwane sesine sikamnu Henry William Longcast.
Unkk Ingrid Filand osicobelela lo mlando uthi uhenry wayehlala eshowe ngesikhathi isilo umpande nomntwana ucetshwayo besahlala khona futhi eselwazi ulimi lwesizulu, okwenza wagcina esengutolika waso.
Wabuye waba ngutolika wesilo ucetshwayo sesiboshiwe ecape Town ekupheleni kwempi kazulu namangisi.
ULIBO LOMNDENI WAKWALONGCAST
Umlando wolibo lwalo mndeni unkk Filand uwuqala kusukela kukhokho wabo engilandi ujohn Longcast nomkakhe usara. Laba ngabazali bakawilliam Longcast owazalwa ngo-1820.
Kwabo kawilliam babebane, abafana ababili namantombazane amabili.
Uwilliam Longcast lona waboshwa kwathi yena nezinye iziboshwa eziwu-218, bafakwa emkhunjini mhla ka-30 kulwezi (November) 1840 bathunyelwa esiqhingini esise-australia, itasmania, lapho bafika khona mhla ka-30 kunhlaba (May) 1841.
Badonsa isigwebo seminyaka ewu-7 nokwathi uma besiqeda babuyiswa ngomkhumbi behliswa ecape Town. Yena wahamba waze wayofika epietermaritz burg lapho wafika wahlala endaweni engu-100 acres owayeyikhokhela irenti.
Wayehlala emzini okwa-no. 6 Loop Street, namuhla lowo mgwaqo osubizwa ngojabu Ndlovu Street. Kulowo muzi kwakunethaveni, yikhishi, yindawo yokugezela nendlu yangasese.
Umkakhe kwabe kungumary Elizabeth Longcast. Kule thaveni yilapho kwakuphuza khona amasosha amangisi nababeyi-ziboshwa phambilini, u-ingrid ababona bengabantu ababenenhlanhla yokuba yiziphathimandla zikahulumeni kungabafanele.
Uthi kulapho kwakuhlelwa khona ukuthi wawuzohlaselwa kanjani umbuso wakwazulu ukuze abamhlophe baziphindisele ngokufa kuka Piet Retief nabalandeli bakhe. Kwathatha iminyaka ewu-41 kuhlelwa lokhu, isiphetho sakhona okwaba yimpi yasesandlwana ngo-1879, ngokusho kuka-ingrid.
Uwilliam Longcast washona mhla ka-24 kundasa (March) 1853 eneminyaka ewu-33, wangcwatshwa est Peter’s Anglican Cathedral, epietermaritz burg.
Umkakhe umary nguye owabhala uhlu lwempahla eyifa likawilliam khona kwa No. 6 Loop Str. Waqhubeka nomsebenzi wethaveni futhi washada nomnu Edward Flett webutho lamangisi, i-45th Regiment.
UMFU ROBERT ROBERTSON UYANGENELELA
Ngo-1854 u-edward Flett nomary bashona ngokulandelana esikhathini esiyizinyanga eziwu2, beshiya uhenry William nodadewabo umary Ann beyizintandane. Kulowo muzi kwangenisa uhenry William Oates owayengomunye wezifiki zamangisi.
Yingaleso sikhathi-ke umfu Robert Robertson (unzimela) nomkakhe uhendrietta abangenelela ngaso betakula izintandane, ohenry William nodadewabo umatilda Ann bazikhulisa.
Yilo Matilda kamuva owashada nogeorge Collins uyisemkhulu ka-ingrid Filand osilandisa ngozalo lwakwalongcast kulolu daba. Kamuva esekhulile uhenry William Longcast kwaba nguye owasindisa umfu Robertson (unzimela) ngokumsusa ngesidlozana emishini Kwamagwaza (yena umfu Robertson) engafuni ngesikhathi kufufusa impi kazulu namangisi ngo-1878.
Kwathi lapho isibambene umfu Robertson waba yi- chaplin yebutho elaliholwa ngucolonel Pearson. Wayevaleleke naleli butho Eshowe ngesikhathi bevinjezelwe yimpi kazulu kusukela mhla ka-23 kumasingana (January) 1879 kuya mhla ka-3 kumbasa (April) 1879.
Ngokomlando umnu Henry William Longcast wayekhona kulezi ziwombe ezilandelayo zempi kazulu namangisi: emajuba, esandlwana, egingindlovu, Nyezane nasolundi.
AMAKHOIKHOI ENZALWENI KALONGCAST
Ngaphandle kukahenry nomatilda, kwakunezinye izintandane umfu Robert Robertson owaba wumbheki wazo, okuyilaba: Harley Abrahams nodavid Abrahams, nezinye izingane eziwu 3 ezazingezo hlanga lwama-khoi - ujohn, Adams, William Adams (owashonela ezandleni zikaIngrid enkandla ngo-july 1970 eseneminyaka elingaliselwa ku-120), Alice Adams nentombazane yomdabu, ujabulisile.
Kamuva esekhulile uhenry William Longcast washada “nodadewabo” u-alice Adams ngombasa (April) 1869 sebehlala Kwanzimela, emelmoth.
Yilokho-ke okwenza kwaba nesizukulwane sohlanga lwamaKhoi enzalweni kahenry William Longcast. Uhenry nomkakhe bazala izingane eziwu-8 okwakungabafana abane, uwalter, urobert, ujohn noharry, namantombazane amane okungoclara, ugrace, u-elizabeth nomatilda Ann (kamuva owashada nogeorge Collins) owethiwa ngebizo likaninakhulu.
Kulawo madodana, urobert washada nentombi yomdabu umaria Sithole owashonela esibhedlela saseladysmith ephethwe yimfiva ngokombhalo wesitifiketi sakhe sokufa.
Uclara owayethembisene umshado nogeorge Collins washona ngokuzuma phansi kwezimo ezibuhlungu zokunukubezwa abulawe ngamangisi mhla ka-27 kundasa (March) 1905 eneminyaka ewu-23 kuphela.
Umatilda Ann indodakazi kahenry William wacelwa nguyise ukuba angene esikhundleni sikaclara, agane ugeorge Collins uma esekulungele lokho. Odadewabo ugrace no-elizabeth bona base bethembisile umshado.
Ugeorge Collins wathunyelwa empini Yomhlaba yokuqala, kwathi ekubuyeni kwakhe ephephile wayeseshada nomati0lda Ann Longcast ngo-1917. Urobert Henry William Collins (uyise ka-ingrid) owayeyizibulo kulo mshado, wazalwa mhla ka-2 kuncwaba (August) 1918.
WAYEBUKEKA KANJANI UHENRY WILLIAM LONGCAST
Ngokombhalo ijournal of Natal and Zulu History, Vol XV 1994/1995 usomlando ujohn Laband umchaza uhenry William Longcast njengendoda okungekuningi okushiwo ngayo ngaphandle kwalezo zincwadi ayebhalelana zona nezikhulu zikahulumeni ngodaba lomhlaba.
Uyaziwa ngempahla yokwembatha okwabe kuyizimbilijisi ezinsundu, nokusamadavathi amboze amabhuzu anensephe ngenhla, yijakhethi enombala oyisibhakabhaka, nebhande lesikhumba eliyisixwexwe ayegaxa kulo ummese.
Ehlombe lesobunxele wayegaxa ibhande okungathi ngelokufaka izinhlamvu zesibhamu, nomgodla okungathi wayefaka kuwona i- telescope.
Ekhanda wayefaka isigqoko esidala esiwumhelane esisho ukuzimboza izigobhe namehlo akhe ayeluhlaza okwesib hakabhaka namashiya amakhulu, esho ngebala elimhlophe ngokuzothile ngenxa yokushiswa yilanga.
UMATILDA ANN LONGCAST
Umatilda Ann ongudadewabo kaHenry William, yena wedukelana nomyeni wakhe, uhendrik Michael Verby, ngokufa noma ngenxa yesiyaluyalu sempi.
Baphuma ngesamagundane nomfu Sivert Samuelson ngesikhathi amasosha amangisi egasela imishini Kwanzimela, baya esandlwana lapho kamuva washada khona nomfu Josiah Tyler.
Ngokombhalo ochonywe enkundleni ye- internet, kuvela ukuthi umfu Sivert Samuelson wazala indodana urobert Samuelson okuyiyona esibike ngayo ngokudlule KWILANGA ukuthi yayingutolika wesilo ucetshwayo ngesikhathi siboshiwe ecape Town, isilo esasithi ngulobede.
Esandlwana umatilda Ann wayesiza ngokubelethisa abesifazane abangamazulu, nokuyinto abeyenza esahlala emishini Kwanzimela ngaphambi kokuqubuka kwempi kazulu namangisi.
Kwathi ngolunye usuku ebuya ethekwini ngesitimela ehamba nezingane eziwu-3 noma 4 zamazulu, badudulwa bakhishwa esitimeleni sihamba eglencoe mhla ka-21 kuNtulikazi (July) 1926. Iyaqhubeka.