ES'KHALENI:
LUCACE bha uhlelo lomkhankaso kapatrice Motsepe ogaqele isikhundla sokwengamela iconfederation of African Football (Caf) ezoqoka ubuholi obusha mhla ka-12 kundasa (March) erabat, emorocco.
Izethembiso ezethulwe ngumotsepe ngolwesine esandton Convention Centre, ziletha ithemba ngokudlondlobala kukanobhutshuzwayo wase-afrika.
Umotsepe uthi uzoqinisekisa ukunyuswa kwemali etholwa yikilabhu nezwe elinqobe imidlalo yecaf okubalwa kuyona i-african Cup of Nations (Afcon), icaf Champi-ons League necaf Confedera-tions.
Le njinga ithembise ukucwaningwa kwamabhuku ezimali zecaf ngendlela esezingeni lo mhlaba, futhi iphathwe ngokwebhizinisi.
Lezi zinto yizona kanye ezidingwa yicaf ukuze ibhola laseAfrika likhule. Umotsepe ugabe ngolwazi olunzulu lwezamabhizinisi futhi uyaziwa ukuthi uyenyanya ukufa inkohlakalo.
Icaf idume ngokuholwa ngabantu abagubuzelwe yinkohlakalo, okuyinto eyehlisa isithunzi sebhola lase-afrika.
Umotsepe usheshe wakucacisa ukuthi uzokwesula esikhundleni sokuba ngumengameli wemamelodi Sundowns nxa ekhethelwe kwesokuhola icaf ngoba imithetho ikubeka kucace ukuthi umholi wecaf akumele azimatanise nekilabhu. Uthe lesi sikhundla sizowela kwindodana yakhe endala ukgotsi Motsepe.
Kuyajabulisa ukubona icosafa ibumbene futhi ivumelana ngokuthi wonke amazwe angaphansi kwayo azovotela umotsepe. Phela lesi sifunda sivamise ukudidiswa ngamanye amazwe bese sivota ngokuhlukana ezintweni ezithinta ukuphathwa kwebhola e-afrika.
Uphillip Chiyangwa wasezimbabwe ongumholi wecosafa, uthe wonke amazwe akulesi sifunda amthwele ngeqoma umotsepe. Azeseka ngokuthi unemali ngakho ngeke alambele ezimalini zale nhlangano njengoba abanye abaholi besolwa ngokufuna ukuzicebisa ngemali yecaf.
Umotsepe ubanga lesi sikhundla no-augustin Senghar wase
Senegal, ujacques Anaouma wase-ivory Coast no-ahmad Yayha wasemauritania. Izinombolo zibukeka zimvuna umotsepe okwamanje, kodwa-ke kusangenzeka kuphenduke amatafula ngoba kuvotwa ngokuyimfihlo.
Ukubaluleka kukamotsepe ekuthatheni lesi sikhundla kufakazelwe wukutheleka kuleli kukagianni Infantino ongumengameli wefifa emhlanganweni weCosafa ngeledlule egoli.
Kulo mhlangano kulapho icosafa iphumele khona obala ngokuthi imthwele ngeqoma umotsepe oyinjinga ehlonishwayo emhlabeni.
Cishe ukungena kukamotsepe kulesi sikhundla kungaholela ekutheni i-afrika yenze kahle nasemidlalweni yendebe yomhlaba.
Kuyajabulisa ukuzwa umotsepe ethembisa nokwethulwa kweVAR emiqhudelwaneni yecaf.
Uthembise nokwenyusa imali yonondweba okuyinto engagwema ukuthi bakhohlakale.
Kumqoka ukuthi ibhola laseAfrika liholwe ngabantu abanolwazi lwezamabhizinisi ukuze kungene abaxhasi kulona bese liyathuthuka. Ukuholwa kwecaf ngabantu abanukwa ngenkohlakalo kuyayilimaza.
Okunye okumqoka kwicaf ukulwa nokucwasana okukhona phakathi kwamazwe akhuluma isiFrench nasebenzisa isilungu. Lokhu akudingeki ngoba zombili lezi zilimi akuzona ezase-afrika.