USAZOQHUBEKA NOKUTHOLA IMIHLOMULO YAKHE UMABUZA
UMNU David Mabuza obeyiphini likamengameli wezwe, uzoqhubeka nokuthola umholo owu-r3 million ngonyaka, aqhubeke athole yonke imihlomulo abevele eyithola ngesikhathi eqhoqhobele lesi sikhundla.
Kuleyo mihlomulo azoqhubeka nokuyithola kubalwa ukuvikelwa ngamaphoyisa aqapha izikhulu ngaphansi kwe-vip Protection, imoto yombuso, nonobhala.
Ukuthola le mihlomulo kukamnu Mabuza kuhambisana nesichibiyelo esenziwa yiphalamende ngo-2008, esagunyaza ukuba impesheni yomengameli kanye namaphini abo yenyuswe ingabe isaba wu-75% womholo wabo ogcwele, kodwa ilingane nomholo ogcwele abebevele bewuthola besasebenza.
Lokhu kuchaza ukuthi umnu Mabuza uzoqhubeka ahole u-r2 910 234 ngonyaka.
Kuzokhumbuleka ukuthi ngonyaka owedlule kwasuka umsindo ngesikhathi kuputshuka imibiko yokuthi umengameli Cyril Ramaphosa uphezu kohlelo lokuchibiyela incwajana equkethe imihlomulo yongqongqoshe namasekela abo, nondunankulu, okuyinto ebizokwengeza eminye imihlomulo kulezi zikhulu zikahulumeni.
Emuva kokugxekwa kukahulumeni ngokuthi ubudedengu, ufuna ukwenza lokho ekubeni isimo somnotho sisibi ezweni, nabantu bekhungethwe yinkinga yobubha nezindleko eziphezulu zokuphila, umengameli ugcine ekuhoxisile ukubuyekezwa kwemihlomulo.
Umnu Mabuza uzotamuza le mihlomulo nakuba isikhathi esiningi ubengumuntu obengavamile
ukubonakala emphakathini, futhi bekubuye kubikwe ukuthi uthathe ikhefu ngenxa yesimo sempilo, obekwenza abukeke njengomuntu obengawenzi ngendlela efanele umsebenzi.
Ungqongqoshe ehhovisi likamengameli, umnu Mondli Gungubele umvikele umnu Mabuza, wathi kayilona iqiniso indlela obekuchazwa ngayo ukusebenza kwakhe.
“Iphini likamengameli umnu Mabuza lisebenze ngokukhulu ukuzimisela; abantu baseningizimu Afrika bazohlala bemkhumbula,”
kusho umnu Gungubele.
Umnu Gungubele uthi umnu Mabuza uyifezile imisebenzi ayeyinikwe ngumengameli. Uthi kuhulumeni ophethwe ngumnu Ramaphosa, abeyingxenye yawo umnu Mabuza, umnotho wezwe ukhule ngo-2,5% ngonyaka odlule.
Ngolwesithathu, iphalamende nehhovisi likamengameli bamemezele ukuthi umnu Mabuza wesulile njengelungu lephalamende, obekusho nokuthi useyehla esikhundleni sokuba yiphini likamengameli wezwe.