UGONYULUKA NGEFU ELIMNYAMA ELIMHLASELE ESELIZE LAMGULISA
UKHALA ngokwehlelwa yisithunzi usihlalo we-african National Congress (ANC), ethekwini, osamisiwe, unkk Zandile Gumede njengoba ehla enyuka egqigqa enkantolo ngenxa yamacala asolwa ngawo okweba imali yethenda yokuqoqwa kukadoti, yesamba sika-r208 million.
Unkk Gumede ukusho lokhu engxoxweni abenayo NELANGA Langesonto. Kusasa ngomsombuluko kulindeleke ukuba avele enkantolo enkulu yasethekwini nabanye abasolwa abawu-21 asolwa nabo.
“Ngiyajabula ukuthi ngemuva kweminyaka ewu-6 ngihleli netshe emahlombe ami, usuku seluze lwafika. Ngifisa sengathi ijaji lingathatha isinqumo kusasa. Akusebenzeki, kunefu nje elimnyama elingilandelayo.
"Ngisho abantu bengijabulela kodwa kuyabuya emqondweni nasenhliziyweni yami ukuthi konje ngilandelwa yileli fu.
“Ngemuva kokusolwa ngala macala, ngihlaselwe wukugula, ngahlaselwa yizifo ezimbili ezingamahlalakhona ezihambisana nengcindezi esengiyoze ngife nazo.
"Ngiyafisa ukusebenzela umphakathi kodwa akwenzeki, icala linginqinde wonke amandla.
"Umndeni wami nebandla lami nabo bahlukumezekile ngala macala. Ngaphezu kwakho konke, ngibonga ukuthi usuku lwecala lungifice ngisaphila, ngifuna izwe lazi ukuthi kwenzekani. Kade lalihlehla, amaphoyisa elokhu ethi asaphenya.
"Ijaji liwabuza umbuzo owodwa nje, ukuthi abopha kanjani uma uphenyo lungaphelile, ayahluleka wukuphendula lokho. Ngiyathandaza ukuthi kusasa lifike liphele noma liqale ukuqulwa,” kuphetha unkk Gumede.
Unkk Gumede wakhethwa waba ngusihlalo WE-ANC, ethekwini, engqungqutheleni eyayisenkosi Albert Luthuli International Convention Centre (ICC), ngo-2022, waqumba phansi imbangi yakhe ewusomlomo emkhandlwini wetheku, umnu uthabani Nyawose.
Wayinqoba le ngqungquthela ehleli ekhaya, eyibukela kumabonakude njengoba wayevinjwe wumthetho weqembu lakhe, othi ilungu elinecala lingazihlanganisi nezinhlaka zeqembu (step aside).
Abameli bakhe, ibulelani Mazomba Attorneys, batshele LANGA Langesonto ukuthi sebemi ngomumo.
“Sonke sesime ngomumo, yithi kanye nabashushisi (kusasa). Ngomsombuluko umbuso uzokwethula ufakazi wawo wokuqala. Silindele ukumphonsa ngemibuzo kuze kuvele iqiniso. "Cishe yonke le nyanga umbuso uzobe wethula ofakazi bawo abazi kahle ngaleli cala. "Njengoba icala lizobe likhonjiswa bukhoma ezinhlakeni ezahlukene zabezindaba, ijaji ubalton liseluleke ngokuthi singabe sisachitha sikhathi, makuhlelwe ukuthi abezindaba bazoyigxumeka kuphi imishini yabo yokuqopha,” kusho ummeli enokuzethemba.
UNKK Zandile Gumede kulindeleke ukuthi avele nabanye enkantolo enkulu ethekwini kusasa
ngomsombuluko.