Inkosi Tembe iqokelwe kwesokuba ngusihlalo esimangaliso
Kubongwe ibhodi eliphumile ngomsebenzi oncomekayo eliwenzile
INKOSI Mabhudu Tembe, yesizwe sakwatembe, Kwamhlabuyalingana, iqokwe njengosihlalo webhodi elengamele isimangaliso Wetland Park Authority. Ithe inethemba lokuthi leli bhodi lizowenza ngokwethembeka umsebenzi walo.
Leli bhodi liqokwe ngungqongqoshe wezamahlathi, ukudoba emvelo, unkk Barbara Creecy, kanti liqale ukusebenza ngasekupheleni kwenyanga eye-dlule futhi lizosebenza iminyaka emithathu.
Ngesikhathi emukela lobu buholi emhlanganweni obusethekwini, unkk Creecy uthe kubalulekile ukuthi leli bhodi libe nombono wesikhathi eside ngale paki, liphinde libheke izindlela ezingasimamisa ngayo ezezimali.
“Sifisa ibhodi liqhamuke namasu azoba nenqubekela phambili ekusebenzeni nasekuhwebeni kwayo isimangaliso, ukuthuthukiswa nokulungiswa kwengqalasizinda, ukubakhona kozinzo phakathi kwayo nabakhe kuyo naseduze nayo, ukuqedelwa kobunikazi bendawo kanye namasu okuhlomulisa imiphakathi eyakhelene nayo,” kusho unkk Creecy.
Uphinde wabonga ibhodi elidala ngamagalelo alo nangokusebenza ngokubambisana kwabo, wathi libe nomthelela ekutheni ipaki liholwe kahle nokusebenza kahle kwemali.
Uncome nezinhlelo ezivule amathuba emisebenzi angaphezulu kwamakhulu amabili namashumi amane anikwe osomabhizinisi abancane, kanjalo nabakwaze ukuqashwa ngaphansi kwalo ipaki.
Umnu Sibusiso Bukhosini, oyiceo kuleli paki, naye uhambe phezu kwamazwi kangqongqoshe ekubongeni ibhodi eliphumile, waphinde wabonga nesigungu esiphezulu sabaphathi abangaphansi kwakhe, athe basebenza ngobuchwepheshe nangokukhiqiza umsebenzi omuhle.
Uthi kube wukusebenzisana ngokubambisana nalo ibhodi ebelibeka phansi izintambo okwenze njengepaki bakwazi ukuhlomula nangemiklomelo yokuba ngabahamba phambili kwezokongiwa kwemvelo nezokuvakasha emhlabeni wonke jikelele.
Inkosi Tembe, esingusihlalo omusha, beyingusekela sihlalo ebhodini ebeliphuma, ibonge amazwi akhuthazayo abawathole kungqongqoshe, yabonga nangokuqokwa kulesi sikhundla. “Njengebhodi sizosebenza ngokuzikhandla ukufezekisa izinhloso zepaki. Ngibonga kakhulu nakungqongqoshe ngokuqoka ibhodi elinabantu abanamakhono emikhakheni eyahlukene, nathi lokho kuzosisiza ezingqinambeni abazohlangabezana nazo ngokuhamba kwesikhathi,” kusho inkosi Tembe. nonhlakaniphos@ ilanganews.co.za