ULAMBELE UKUKHULA KWEZOKULINGISA OZOLINGISA INDAWO EQAVILE KUMKHOKHA
UMLINGISI ukufanisa nokuphoswa esizibeni esishonayo ukudlala indawo eqavile emdlalweni okhuza ibuya Umkhokha, okulindeleke ukuthi uqale ukukhonjiswa kusasa ngomsombuluko esiteshini esingaphansi kwemnet imzansi Magic.
Lo mdlalo osuzoba wuchungechunge, uzovala isikhala sediepcity efinyelele emaphethelweni ngolwesihlanu ngemuva kweminyaka emithathu ikhonjiswa kumabonakude.
Uzodumo Shange wasefolweni kodwa osezinze emgungundlovu, uzolingisa indawo kamamzobe esemncane okuyindawo edlalwa ngudeli Malinga, ongomunye wabalingisi abaqavile kulo mdlalo obhekwe ngabomvu njengoba uqoshelwa ethekwini.
Uzodumo ube nengxoxo NELANGA Langesonto mayelana nokuthola le ndawo athe ngeyokuqala enkulu kumabonakude.
“Ngiyafana nomuntu ophoswe esizibeni, waphoqwa ukuthi abhukude azihlenge. Ngenhlanhla ngithole ukwesekwa ngabaqondisi balo mdlalo, ngiyathemba ukuthi abantu bazokuthokozela ukungibona ngilingisa ezinye iziqephu zikamamzobe esemncane,” esho.
Uthi ungene kulo mkhakha engumdansi ngo-2010, izinto ziqale ukuhlangana kahle ngo2015 ngesikhathi ethola ithuba lokuzungeza E-UK izinyanga eziyisithupha neqembu ilions of Zululand.
Uthi ukuba ngumdansi kumenze wabonakala emidlalweni eyahlukene yeshashalazi, ekhombisa ngezinhlobo ezahlukene zomdanso.
Uthi nakuba ebegxile emdansweni kodwa uthando lokulingisa belilokhu likhona, ngoba ubezihamba izinhlolokhono. “Ukudansa yikhona okuhamba phambili kodwa ngenxa yokuthi siphila eningizimu Afrika lapho izinto zihamba ngezikhawu, kuyaphoqa ukuthi umuntu ahlale ethungatha ezinye izindlela zokuphila,” kusho yena. Uveze ukuthi ngaphambi kokuthola le ndawo uke wavela kancane kwidurban Gen kodwa kwangaba yindawo etheni.
“Nakhona ukuthola indawo kumkhokha ngangiyokwenza inhlolokhono yembewu ngase ngicelwa ukuthi ngibuye ngakusasa sengizokwenza eyomkhokha. Angitshelwanga nokuthi ngizokwenza inhlolokhono yayiphi indawo njengoba nganikezwa i-script, nebala ngazinikela,” kusho uzodumo enezela ngokuthi akakholwanga ngesikhathi ethintwa, etshelwa ukuthi kumele aqale ukuqopha ngakusasa. “Ngafikelwa yizinyembezi sengibonile ukuthi ngizolingisa indawo yomlingisi engimhloniphayo (udeli Malinga).” Uthi ngemuva kokuqopha isiqephu sokuqala wakhuthazeka abaqondisi bencoma indlela enza ngayo ngosuku lokuqala.
“Ngathi ngisajatshuliswa wukunconywa, ngakhuthazwa nawukunconywa ngudeli.” Kulo mdlalo umamzobe ngowesifazane ononya futhi owenza izinto ezisabisayo. Uzodumo uthi indawo yakhe izobe icacisela ababukeli kabanzi ukuthi kungani umamzobe aphenduka lo muntu anguye ngenxa yezigigaba adlule kuzona. Uthe usekulambele ukuzakhela igama njengomlingisi kunokuba wumdansi. “Lokhu akusho ukuthi sengikubeka eceleni ukudansa,” usho kanje. Umkhokha ubophele abalingisi abanohlonze okubalwa kubo unay Maps Maphalala, uhope Mbhele nabanye.
Ngafikelwa yizinyembezi sengibonile ukuthi ngizolingisa indawo yomlingisi engimhloniphayo...