BALANYULELWE NGAMAPHOYISA ABASOLWA NGOKUQOLA ABANTU KUMA-ATM ESHOWE
BAHLANGABEZANE nezimbila zithutha abasolwa ababili besilisa nowesifazane oyedwa ababanjwe oqotsheni beqola imali yabantu kuma-atm edolobheni laseshowe ngolwesithathu.
Lezi zigilamkhuba okubalwa kuzo nowesifazane osekhulile, zicushelwe ugibe ngamalungu omphakathi azinikele ekulweni nokuqolwa kwabantu, ikakhulu uma kuphele inyanga.
Kubikwa ukuthi sikhulu isililo kumalungu omphakathi, ikakhulukazi abantu asebekhulile abasuke bezohola imali yempesheni nesibonelelo sikahulumeni ngobugebengu kuleli dolobha.
Kuvela ukuthi abasolwa bayaye bacuphe imishini ukuba ibambe amakhadi abantu, kube nzima ukukhipha imali.
Kuthiwa emuva kwalokho bakuyalela ukuba uqhele emshinini ukuze bezokusiza bona, maqede bakunike ikhadi okungelona elakho.
Ngosuku lwesigameko kuthiwa bathe beqala nje ukugila lo
mkhuba kwasho ukuthi bafike sezigawulwe zabekwa.
Ngokusho kwelungu lomphakathi elicele ukuba kugodlwe igama lalo, ebelikhona kwenzeka konke, amalungu omphakathi adinwe ashaya aphinde aketula imoto ebihamba abasolwa.
“Bekungathi kudlala ifilimu ngenkathi amalungu omphakathi eketula imoto ayibhekisa phezulu ngoba efuna kuphume abasolwa.
“Abanye bebefuna ukuyishisa nabo bephakathi.
“Kusize ukuthi kufike amaphoyisa kamasipala okuyiwona avimbe amalungu omphakathi abediniwe egane unwabu.
“Abantu bakhala ngokuthi nyanga zonke kubanjwa imali yabantu, kwesinye isikhathi abanye babuyela emakhaya bengasenawo amakhadi,” kusho leli lungu lomphakathi.
Okhulumela amaphoyisa Kwazulu-natal, ult-colonel Nqobile Gwala uthe amaphoyisa aphenya icala lokususwa kothuthuva emphakathini.
“Akekho oboshiwe ngalesi sigameko.
“Amalungu omphakathi aphakamise imoto ebihamba abasolwa.
“Kulesi sigameko kulimale onogada ababili,” esho.