ULIMIT UXWAYISA OMASIKANDI ABADIDWA WUDUMO NGEZISELE ZENDIMA YOMCULO
UQAPHELISA omasikandi abasebancane endimeni yomculo ngokubaluleka kokuziphatha kahle empilweni ukuze bagweme izifo zocansi ezidonswa wudumo lomculo.
Lokhu kuvezwe usphelele “Limit” Nala (24) (osesithombeni) wasentolwane, enkandla ongomunye womasikandi abasebancane ofike ngeshodi endimeni yomculo.
Engxoxweni yakhe naleli phephandaba, uthi udumo olubakhungethe ngenxa yokuthakaselwa kakhulu, lubabeka engcupheni.
Uveze ukuthi akufanele okwenzeke kubaculi abadala bebhuqwabhuqwa yizifo, kubaphinde nabo abacula kule minyaka.
“Kubalulekile ukuziphatha kahle ukuze ungahambi ngendlela engaqondakali emhlabeni, ngoba ukuthandwa ngabantu kuyazizela kakhulu uma uyiciko elithandiwe endimeni, lokho kwenza izinto eziningi zenzeke kalula.
“Ngalokhu ngiqonde ukuthi kubalulekile ukuthola umuntu wesifazane oqondile ozovela naye kwaziwe ekhaya ukuze uzoqoqeka kube khona umuntu omesabayo noma ngabe ufikelwa ukwenza izinto zobusha ezingalungile.
“Lokho nje kwenza ukuba umuntu abe nonembeza akwazi ukuphatheka,” kusho ulimit.
Le nsizwa ithi ukwamukeleka kwayo kahle endimeni kamasikandi, kusayithusile namanje njengoba ukubukwa nokulalelwa komculo wayo online, sekungaphezulu kwabantu abawu-3 million.
Ithi lokhu kuyizinkomba zokuthi eminyakeni embalwa ezayo izobe isibalwa nezihlabani zomculo kamasikandi.
Ulimit uthi isifiso sakhe wukukhula aze aphumelele.
“Kukhona abafowethu ababili lana kumasikandi abaphumelele kakhulu ngokomculo wabo. Bakwazile ukwakha imizi yoyise, bondla nemindeni yabo. Lokhu-ke kuyisifiso sami esikhulu ukushintsha ikhaya lakithi, nakuba igama lami selaziwa kakhulu kumasikandi kodwa kusagqoza ukutholakala kwemicimbi ekhokhayo,” kusho ulimit.
Ugqugquzele abaculi abasazofika endimeni ukuba baqaphele isitayela abasiculayo ukuze sihambisane nesikhathi samanje. Uthi noma ngabe kwakukhona umculi obukela kuyena eminyakeni edlule, kodwa kufanele ucabangele isikhathi samanje.
“Uma wawuthanda lelo qhawe lakho, akuchazi ukuthi namanje kusafanele ucule njengalo, lalidla ubhedu ngesikhathi salo, sezishintshile izinto. Abaculi abasha bashaywa yisitayela,” esho.
Uveze ukuthi akuzange kube lula ukungena emculweni nakuba bebaningi abebelithakasela ikhono lakhe kodwa bekunezingqinamba zokuthola usizo lwemali ukuze ezofezekisa ikhono nephupho lakhe. Uveze ukuthi uqale ukwenza ama-demo eminyakeni edlule okuyilapho abantu abaningi beqale khona ukumuzwa esesabalalise izingoma zakhe ezinkundleni zokuxhumana.
Uphothule umatikuletsheni ngo-2020, emagqama High School. I-albhamu yakhe yokuqala inesihloko esithi, “Dankie Son”-walandela ngethi “I-mathematics” nyakenye.