Kuvela eyokungenami kwesitobha sechiefs
Ukunyiwa yisikimu sekusikhiphe nakwibafana Bafana
KUPUTSHUKA ezithi isitobha sekaizer Chiefs sihlela ukuphuma kule kilabhu ngenxa yokuthi sizibona sesifana nefenisha njengoba sisizwa ngendaba isikimu.
Unjabulo Ngcobo ujoyine le kilabhu kumasizini ambalwa adlule esuka kwiswallows FC abefana nokhonkolo odongeni lwayo emuva.
Usayiniswe yichiefs ekade eqokwe njengomdlali wasemuva ovelele wesizini kwipremier Soccer League (PSL).
Ufike ephefeni walithola ijezi ngaphansi komqeqeshi ustuart Baxter, yize ubemdlalisa enkabeni yesisu.
Nokho selokhu kuqashwe u-arthur Zwane njengomqeqeshi, isikimu usesizwa ngendaba.
Leli phephandaba lithole ukuthi lesi sitobha, esidabuka emthwalume, ogwini oluseningizimu yekwazulu-natal, kasiseneme ngokuba kwichiefs, sesifuna ukuhamba. Umthombo osondelene
kakhulu nalo mdlali, uthe: “Nakuba ungcobo engakayazisi ichiefs ngemizwa yakhe, kodwa umphathi wakhe, okunguyena omsayinise kwichiefs, uyazi ukuthi lo mdlali ufuna ukuhamba.
“Ichiefs imphethe ngokweqophelo eliphezulu; akakhali ngalutho.
“Inkinga wukuthi uyabona ukuthi umqeqeshi akamuzwisisi kahle.
“Yize esanenkontileka nechiefs kodwa ufuna ukuhamba aye lapho ezonikwa khona ithuba lokudlala.
“Into emkhalisa kakhulu wukuthi ngesikhathi eya kwichiefs ubezitshela ukuthi izomsiza avulekelwe ngamathuba okudlala njalo kwibafana Bafana kodwa akasabizwa nhlobo, njengoba engadlali.
“Kodwa-ke indaba yakhe umphathi wakhe uzoyilungisa kahle ngokuphela kwesizini.” Umpendulo Nyuswa, ophethe izindaba zikangcobo, ebuzwa ngalolu daba, uthe: “Lokhu ongibuza khona ngongcobo ngiqala ukukuzwa ngawe. “Yebo yena akadlali kodwa ulinde ithuba lakhe, yingakho ejima ngokuzikhandla njengoba ebuye azijimele yedwa. “Eyokuthi ufuna ukuhamba akuyona into engingathi useke wayikhuluma kimina, okwamanje ngazi ukuthi usajabule kwichiefs.”