Sisesikhulu isikhala sebloem Celtic ebholeni lakuleli
UMDLALO welast 16 wenedbank Cup phakathi kwemarumo Gallants nemamelodi Sundowns ngolwesine kusihlwa efree State Stadium, wembule ikhasi ebeselithanda ukukhohlakala ngothando izakhamizi zakulesiya sifundazwe ezinalo ngonobhutshuzwayo.
Phela abathandi bebhola basefree State bazakhela igama ngokweseka ibloemfontein Celtic ngomfutho omangalisayo, ikakhulukazi emidlalweni yale kilabhu yasekhaya.
Lokhu babekwenza kungakhathalekile ukuthi iceltic iyanqoba noma iyehlulwa.
Yingakho-ke sisesikhulu isikhala seceltic ebholeni lakuleli.
Ngisho ukaizer “Shintsha Guluva” Motaung, ongusihlalo wekaizer Chiefs, waze walibeka ngesihloko elokuthi iceltic yiyona kuphela ikilabhu ebathwalisa kanzima ngokwabalandeli kuleli uma beyodlala nayo ebloemfontein.
Lapha umotaung wayengayibali i-orlando Pirates eyizimbangi zabo ezinkulu ngoba kusukela kudala, isoweto Derby igcwala phama abalandeli bala makilabhu athathwa njengamakhulukazi kuleli.
Nasemdlalweni wegallants nesundowns, kujabulisile ukubona abathandi besiwelele betheleke ngezinkani bezokweseka igallants okuyiyona ebibalethele lo mdlalo.
Nangemuva komdlalo abalandeli baqhubekile nokuhuba izingoma, bejabulela ukuba kule nkundla.
Abadlali nezikhulu zegallants kabaphoxanga njengoba besondele kubalandeli ukuyojabula nabo.
Umnikazi wegallants, u-abram Sello, uthe basazoqhubeka nokuhambisa imidlalo efree State njengoba namuhla ngesonto bezodlala nets Galaxy khona efree State Stadium.
Abathandi bebhola kulesiya sifundazwe basala dengwane ngemuva kokuba igugu labo lithengwe ngabanikazi beroyal AM ngasekuqaleni kwesizini edlule, maqede balishintsha igama laba yiroyal AM, baphinda balifudukisela ethekwini.
Ukuthuthela ethekwini kwe-am kwashiya abalandeli besiwelele nenkulu intukuthelo eyagqama nangesikhathi kunemacufe Cup ngonyaka odlule njengoba abaningi bengazange bayingene eyokuyokweseka lo mqhudelwano phambilini obugijinywa yisiwelele nezimpofana.
Ngonyaka odlule bekumenywe ichiefs ne-am okuyinto eyacasula abalandeli bakuleya ndawo, bethi kuyindelelo ukuthi bangaphucwa iqatha emlonyeni ngabanikazi be-am bese umasipala wabo unika imali izikhulu zale kilabhu kashauwn “Mamkhize” Mkhize ukuzodlala endaweni yabo.
Ngikholwa wukuthi izikhulu zepremier Soccer League (PSL) kumele ziyibuyekeze indaba yokuvumela ukuba amakilabhu anabalandeli asuswe ezizindeni zawo ngabantu abanemali ngoba lokhu kugcina sekushaya kwawona lo mdlalo ngemidlalo ebukwa yimithonsenyana yabalandeli.
Izinkulungwane ezizifela ngechiefs nepirates kazisoze zakwemukela ukuba enye yala makilabhu, ukwenza isibonelo nje, ithengwe yisiqumama sasekapa maqede siyishintshe ibizwe ngecape Town Chiefs noma icape Town Pirates, iphinde iyozinza khona, okungaqeda nya ngesoweto Derby.