BAPHONSELWE INSELELO ABE-CHIEFS KUBUNGAZWA IMPILO KA-BIZZAH DLAMINI
IKAIZER Chiefs nomndeni kamichael “Bhizzah” Dlamini bakhumbule lo mdlali emcimbini obukwakhe enewlands West ethekwini, maqede yenza ayedume ngakho uma edlala ne-orlando Pirates ngokuyehlula ngo-1-0 emdlalweni womkhaya wakamuva.
Lokhu kulandele izinkulumo zabadlali abayibamba nobhizzah abebemele ichiefs kulo mcimbi zokuthi lo mdlali wayekukhonze kakhulu ukushaya amagoli amaningi ikakhulukazi uma bedlala nepirates, osekuyivela kancane uma kududulana lezi zinkunzi zasesoweto.
Abadlali abebemele ichiefs kulo mcimbi ngujoseph “Banks” Sethlodi, ubigboy Kholoane, ujackie Masike nolucky Stylianou abadlulise imiyalezo evela kukaizer Motaung ngale nkakha ebikhunjulwa, edlule emhlabeni ngo-2017.
Ustylianou ufunde amazwi aqhamuka enaturena abethi: “Siwumndeni wekaizer Chiefs siyabonga ngomnikelo wakho ekusungulweni kwale kilabhu nomsebenzi owenzele yona.
“Siyazi ukuthi unathi ngokomoya lapho ukhona futhi uhlala usifisela okuhle kodwa, yingakho sizohlanganyela nomndeni wakho emcimbini wokukhunjulwa kwakho.”
Usethlodi uthe kayikho into eyayijabulisa ubhizzah ukwedlula ukushaya amagoli.
“Wayengenandaba nomjiko yize ayewuthanda, okubalulekile kuyena wukubala amabhola ashaye enethini okuyinto ayedume ngayo futhi eyamenza isikwibhisi sikanombolo-9 kwichiefs naseningizimu Afrika yonkana.
“Yikho lokhu okwamphendlela isikimu kuzo
zonke izikwati zesa Black XI ezake zabakhona kuleli.
“Kuze kube yimanje akakabi khona umdlali osaphule irekhodi lakhe lokushaya amagoli amathathu emdlalweni owodwa izikhathi eziwu-13,” kusho usethlodi.
Lo nozinti owayezwana kakhulu
nobhizzah naye ukhale ngendlala yamagoli emidlalweni yakamuva yechiefs nakwipremier Soccer League yonkana.
Uphonsele abadlali bechiefs inselelo yokwephula irekhodi likabhizzah. “Siyohlala sikukhumbula njalo ‘Monkey Jive’, uyibekile induku ebandla.”