ICHIEFS IQHUBEKILE NOKUVULELA ISIBHAXU
IQHUBEKILE nokwenza kahle ikaizer Chiefs iguqisa irichards Bay FC ngo-1-0 kowedstv Premiership izolo ngomgqibelo ntambama eking Zwelithini Stadium, emlazi.
Igoli elinyakazise inkundla lize nosiyabonga Ngezana ngomzuzu ka-8.
Ungqofele enethini i-free kick kamduduzi Shabalala obeshibilika kuhle kommese oshisayo unqamula ebhoteleni.
Ichiefs ibisinqoba umdlalo wesibili kulandelana njengoba nangeledlule ibhaxabule izimbangi zayo ezinkulu i-orlando Pirates ngo-1-0 egoli.
Emdlalweni wayizolo, unondweba umasixole Bambaniso unike ikhadi elibomvu unozinti webay FC usalim Magoola ngomzuzu ka-19 okwenze le kilabhu yaqeda umdlalo ingasaphelele.
Endaweni yakhe kungene uneil Boshoff osuka kumazulu FC owenze umsebenzi oncomekayo ephunga amabhola amaningi abeqhamuka nechiefs.
Ibay ikhiphe ulangelihle Mhlongo obekuchwaza abalandeli uma ephethe ibhola ukufaka lo nozinti.
Kulo mdlalo abalandeli bebefike ngezinkani nakuba amathikithi ebekade emba eqolo (ewu-r100) kwazise ubuthathwa njengomunye wemikhulu ngaphansi kwepremier Soccer League (PSL).
Uyusuf Maart wechiefs unikwe ikhadi eliphuzi ngemuva kokudlalisa kabi usomila
Ntsundwana. Ichiefs ikhiphe ushabalala nochristian Saile kwangena ukamohelo Mahlatsi nokgaogelo Sekgota yabuye yakhipha ucaleb Bimenyimana kwangena uwandile Dube.
U-arthur Zwane, opheka ichiefs, uvale uphawini wakhe ngokukhipha umaart wafaka
usamkelo Zwane.
Ibay FC ikhiphe untsundwana kwangena u-ochieng Ovella.
Ibay FC ibuye yakhipha untuthuko Mabaso kwangena umoses Mthembu noyanela Mbuthuma kwafakwa ukatleho Makateng abangazange benze lutho enkundleni.*