ZIKHUZA UDLAME NGENGOMA IZINGANE ZOMA
LIKHUZA udlame ezizweni zamakhosi iqembu elidala likamaskandi, ngengoma yalo ephume ngolwesihlanu. Izingane Zoma ziqophe ingoma egqugquzela ukubuyisana. Kule albhamu entsha esihloko esithi, “Umfazi Womuntu Enqunu”, likhuthaza ukuhlalisana kahle kwabantu. Kwenzeka lokhu nje, bayaphela abantu esizweni sakwasithole, eqhudeni, kwangqulu, enquthu okuyilapho kudabuka khona leli qembu. Balinganiselwa kwabawu-8 abantu abadutshulwe babulawa kwangqulu kusukela ngumfumfu (October) kulo nyaka.
Ngesonto eledlule kuphinde kwabulawa omunye obengaziwa endaweni, okuthiwa ushaywe umphakathi waze wafa, ebuzwa ukuthi ufunani kule ndawo ngoba kuhlaliswene kabi, akusathenjwana. Uthandoluni Phungula wezingane Zomaokunguyena ocula phambili, uthi noma ngabe kuxatshenwe kanjani, bagqugquzela ukuthi imiphakathi ilungise izinkinga. “Asizazi izimpi zabo eziqale emigodini yasezimayini egoli, sithi akuxoxwe, kungapheli abantu. Le ngoma ithinta abantu abangahlalisene kahle emiphakathini abayakhele,” esho.
Uthi i-albhamu ibophele amanoni azothakaselwa kakhulu. Uveze ukuthi nakuba izingoma zabo eziningi ezihambisana nesikhathi samanje kodwa izimo zomculo sezibajikele bona abaqale umculo eminyakeni edlule. Uthi ziningi izinselelo, kodwa bayazama ukuqinisekisa ukuthi izinga lomculo wabo lihambisane nesikhathi samanje.
“Isikhathi esicula kusona njengamanje kukhona esibavunayo, okwenza kube nzima kithina esesibadala ngoba nezindlela zokudayiswa komculo sezishintshile. Eminyakeni edlule bekusebenzeka ngokudayiswa komculo kodwa manje umculi usephiliswa wukuthi aqashwe emcimbini ukuze athole amasenti, kuyenzeka aqashwe futhi angakhokhelwa,” esho.
Uthi ezobuchwepheshe zokusabalalisa umculo, zisabanikeza inkinga. Uthi zisebenzela abafike ngesikhathi sazo futhi abafundile. “Siyababongela abantu abasha abafike ngesikhathi semfundo ngoba izimo sezinzima kakhulu. Siyafisa ukuqashwa ukuze kuphile imindeni ngoba eminyakeni edlule bekuphileka ngokuthengwa kwamacd lawa angasekho ematheni,” esho.
Uthi babophele izingoma eziningi ezihlabahlonisile, kukhona nekhuza omalume abajikela abantwana ngakwezocansi nezinye. Izingane Zoma ziqale ngo-1993 ukukhipha umculo, sezihlanganise iminyaka ewu-31.