Akalona ivukana owokhozi FM ohlonishwe ngendondo
Unaneziqu zomthetho umsakazi (26) oseneminyaka engaphezulu kweyishumi ekulesi siteshi
AKALONA ivukana emsakazweni uneliswa Cele (26) ongumsakazi osemncane wokhozi FM ohlonishwe ngendondo yebright Star Inductee emcimbini wesa Radio Awards obusesandton Convention Centre egoli ngeledlule.
Le ntokazi - eyaqala kwezokusakaza iseyingane esiteshini somphakathi Ikhwezi Community Radio - ithi izizwa ithobekile ngokuhlonishwa ngale ndondo kulo mcimbi njengoba isike yanqoba kuwo lo mcimbi phambilini ngesikhathi isasakaza kulesi siteshi somphakathi.
“Ngangena kwikhwezi cishe ngineminyaka ewu-9, ngangenza izinhlelo zezingane. Ngokuhamba kwesikhathi ngaqokwa ngaphinde nganqoba kulo mcimbi ngesikhathi usabizwa NGESABC Community Radio Awards ngaphansi komunxa webest Community Radio Presenter, futhi ngaklonyeliswa nangendondo enkulu yosuku (overall award),” isho.
Le ntokazi ithi kulesi sikhondlakhondla somsakazo yangena cishe isineminyaka ewu-14 ubudala ngemuva kokuchushiswa ngumsakazi waso osanda kudlula emhlabeni u-irvin Sihlophe, naye owaqala kwikhwezi FM.
Uneliswa - owenza izinhlelo zezemfundo kulesi siteshi uthi ngusihlophe owamsiza ngokwenza i-demo waphinda waxhumana nabazali bakhe ngethuba lokungena okhozini njengoba ngaleso sikhathi kwakudingeka abantu abasha abazokwenza uhlelo olwabe lubizwa ngestate Your Mind.
“Nebala ngayithumela i-demo yami, ngahamba nezinhlolokhono ngaphambi kokugcina ngiqashiwe,” esho.
Sekuphele iminyaka engaphezulu kweshumi esokhozini. Ngaphandle kokwenza izinhlelo zezemfundo kulo msakazo, uphinde abe ngumethuli wezinhlelo zikamabonakude zalo msakazo.
Uthi usakuthokozela ukuba kulo msakazo kwazise kuningi akufundayo okuphathelene nawo nempilo jikelele. Wenqabile ukuphendula umbuzo mayelana nokuba nohlelo lwakhe kulo msakazo.
“Hhayi ngeke ngiwuphendulo lowo mbuzo, ngiyazi isihloko sodaba sizosuke sibhalwe ngamagama amakhulu athi, owokhozi ufisa ukuba nohlelo lwakhe. Mangithi ngisakujabulela ukuba sokhozini futhi ngiyaqhubeka nokukhula kulo msakazo.”
Uthi ukuthola kwakhe indondo kusaqinisekisa khona ukuthi kukhona abangaphandle abawubonayo umsebenzi wakhe. Ngaphandle kokuba sokhozini, uneliswa uphinde abe ngumethuli wohlelo lwezimoto esiteshini sikamabonakude i-1 KZN Imoto Media.
Uthi kuningi akufundile ngezimoto ngokuba kulolu hlelo njengoba kungekhona nje ukushayela imoto okumqoka kodwa nocwaningo ngezimoto lubalulekile.
“Engikufundile ngokwenza lolu hlelo wukuthi wonke umuntu unohlobo lwemoto oluhambisana naye, nempilo ayiphilayo. Kusukela kulabo abanemindeni emikhulu, yilabo abahlala emakhaya nalabo abangabafundi abasanda kuthola izincwadi, zikhona izimoto ezakhelwe bona,” esho.
Uthi nakuba besamile ukuqopha kulolu hlelo kodwa usazimisele ukuqhubeka nalo ngoba uyakuthokozela ukufunda nokucobelela abanye abantu ulwazi ngezimoto.
Le ntokazi egabe ngeziqu zomthetho (Bachelor of Law Degree) ezithole esikhungweni semfundo ephakeme i-university of
Kwazulu
Natal, ithi nakuba yenza imisebenzi eqhelelene nemfundo yayo kodwa kukhona ephezu kwakho ezimisele ukungena kukhona okuthinta zona izifundo zayo.
Uneliswa uke waveza ikhono lokulingisa emidlalweni yomoya khona okhozini kanti uke wavela kafushane kwidurban Gen, okuwumdlalo obukhonjiswa esiteshini esizimele i-etv. Uveze ukuthi nakuba sekunezinye izindlela zokulalela umsakazo kodwa lisekhona ithuba lokuthi imisakazo iqhubeke nokukhula, kwazise baningi abasakuthakasela ukuyilalela. lucky. cain@ ilangane-ws. co.za
Hhayi ngeke ngiwuphendule lowo mbuzo, ngiyazi isihloko sodaba sizosuke sibhalwe ngamagama amakhulu athi, owokhozi ufisa ukuba nohlelo lwakhe...