U-PRINCIPAL ‘WAZAMA UKUFAKELA UNTOMBELA USHEVU UKUMBULALA’
UDEDELE amabhomu eshayelela isipikili sokugcini ukuba abasolwa bangayitholi ibheyili izolo ngolwesihlanu enkantolo yemantshi emlazi, umphenyi wecala uwarrant Officer Sibusiso Ntshangase, ecaleni lokubulawa kukacapt Thomas Ntombela.
Abasolwa yinkosikazi kamufi unkk Faith Ntombela nomnu Sithembiso Khumalo, onguthishanhloko wasempephose Primary School, Kwamaphumulo.
U-W/O Ntshangase uveze la mabhomu ngesikhathi abasolwa bezofaka isicelo sebheyili, sahlehliselwa isonto elizayo. U-W/O Ntshangase ukubeke kwacaca ukuthi uyaphikisana nokuthi bayithole ngezizathu zokuthi icala elibhekene nabo libucayi kanti nobufakazi abuqukethe bunzima.
Udalule ukuthi abamangalelwa bobabili baboshwa nje bese bezame izikhawu zaze zaba mbili zokubulala ucapt Ntombela, behluleka.
“Ebufakazini engibuqoqile kuvela ukuthi abasolwa bazame izikhawu ezimbili ukubulala untombela. Bazame ukumdlisa ushevu, bazama ukumdubula nakhona bahluleka, baze bamnqoba ngokwesithathu.
“Itulo lokuqala lokumdlisa ushevu kaliphumelelanga ngoba ukhumalo wazama ukuyothenga ushevu obulala izinambuzane notshani emapulazini, wangawuthola,” kusho U-W/O Ntshangase.
“Umufi ubefika ekhaya ngesikhathi unkk Ntombela emcela ukuba amphuthumele esitolo, ingane yabo yazama ukumphelezela kodwa unkk Ntombela wayinqabela. Ngemuva kwemizuzwana umufi ephumile, kwezwakala sekuqhuma isibhamu.
“Ingane yaphuma ngejubane iyobheka uyise, yabona umuntu efake umfaniswano wamaphoyisa ebaleka, uyise esedindilize phansi. Yaqhubeka yamjaha imemeza omakhelwane ukuba bayisize, kodwa bahluleka ngoba umbulali wayegiya ephethe isibhamu. Ngaleso sikhathi unkk Ntombela waphuma wama phambi komnyango.
“Omakhelwane basiza untombela, bamphuthumisa esibhedlela, unkk Ntombela wabalandela ngenye imoto. Kuphinde kwavela ukuthi izibhamu ezimbili zikantombela, esomsebenzi nesakhe nomfaniswano womsebenzi, wakuntshontsha wakunika inkabi ukuba ikusebenzise uma isibulala untombela,” esho.
U-W/O Ntshangase uthe naye impilo yakhe ike yaba sengcupheni Ngesikhathi eseqala, efaka isicelo sokukhokhelwa imali yomyeni wakhe, ngangimsayinelile. Usuke lapho waqasha izinkabi ukuba zingibulale ngoba nginqaba ukumsayinela amaphepha okuthi akhokhelwe.
“Zonke izinto zokufaka isicelo senkokhelo ubezenza la enkantolo njengoba ebesebenza khona,” esho. Icala lihlehliselwe isonto elizayo.