'Ubulale umngani egqiba ubufakazi'
KUHLWE emini, elahlwa ngamacala owesilisa wasehighflats, owabulala umngani wakhe ezama ukucima ubufakazi ngecala abalenza naye. Unhlanhla Mkhize (27), ulahlwe yinkantolo enkulu yasescottburgh, ngolwesine ngamacala amane, amabili okubulala, elokuthumba nelokushaya.
Kube yinjabulo emalungwini omndeni wabafi ngesikhathi inkantolo ilahla umkhize ngamacala, okubulala ucebelihle Thobelani Hlongwa (23) nokhalesakhe Jwara (29), owayengumngani omkhulu kamkhize.
Umkhize wabulala umngani wakhe ujwara, ngoba edinwa ukuthi uthe uzokhuluma lonke iqiniso ngokuthi yibona ababulala uhlongwa, ababemsola ngokuthi untshotshe amateku kamkhize.
Umkhize kulindeleke ukuba agwetshwe ngomhla ka-28 kuzibandlela (December). La macala enzeke kwadumisa, emzinto ngo-2021.
Ijaji um Chetty, limtshele ukuthi limlahla ngamacala amane libuyekeze zonke izethulo ezenziwe wofakazi. Liveze ukuthi ubufakazi bukamkhize abuthembekile njengoba bebushayisana nobo-mfowabo owabizwa nguyena ukuthi azomfakazela.
“Umfowenu utshele inkantolo ukuthi wena ngesikhathi sesehlo wawungasasebenzi, kodwa wena uqambele amanga inkantolo wathi wawusebenza.
Ukungayi kwakho emngcwabeni womngani wakho ujwara, kushayelele isipikili sokugcina sokuthi uyathinteka ekufeni kwakhe.
“Uzithethelele ngokuthi kawu-yanga ngoba wawusebenza, kodwa umfowenu uthi ngalesi sikhathi wawungasasebenzi,” kusho ijaji.
Ijaji liphinde laveza ukuthi umkhize ngesikhathi ethumba umufi uhlongwa, wafonela unina unkz Makhosazana Hlongwa, embikela ukuthi indodana yakhe imntshontshele amateku.
“Ufonele unina kamufi umazisa ukuthi umthumbile, wakweluleka ngokuthi umyise emaphoyiseni, kodwa wena wangakwenza lokho.
Unina uphinde wakhokha isamba semali ewu-r5000, emizamweni yakhe yokuphephisa impilo kamufi,” kusho ijaji.
“Inkantolo iyagculiseka ngobufakazi obuphambi kwayo, kuyavela ukuthi uyathinteka ekufeni kukajwara ngoba wayezoba ufakazi oqanda ikhanda ekufeni kukahlongwa.
“Uthumbe uhlongwa, wambulala isidumbu sakhe wasitshinga epulazini ngakho ngikulahla ngala macala.”
Kusukume ummeli wakhe usicelo Zungu wathi, ucela ukukhishwa kwesigwebo kuhlehliswe, usafuna ukuxhumana kahle nekhasimende lakhe.
Unkk Zanele Jwara ongunina kamufi ujwara, uthe uyajabula ngesinqumo.
“Kubuhlungu okwenzeka. Le ngane yashona yashiya ingane encane enezinyanga eziwu-7, ibulawa umuntu obengumngani wayo. Noma besingamazi umbulali kodwa ingane ibihlale isitshela ngaye ukuthi bayezwana. Siyaqala ukumbona ngamehlo. Sizizwa sijabule kakhulu ukuthi ulahlwe yicala, sesolinda isigwebo,” esho
Unkz Makhosazana Hlongwa ongunina kamufi uhlongwa uthe okumehlele akakufiseli muntu. “Bengiphuma ngingena ezibhe-dlela ngidukelwe yingane yami, ize yatholakala ngemuva kwezi-nyanga eziwu-6 seyaba ngamatha-mbo.
“Umkhize wangifonela engibi-kela ukuthi usola ingane yami ngokweba. Ngameluleka ngokuthi makayihambise emaphoyiseni, ngizofika ngosuku olulandelayo. Sengifikile, wangitshela ukuthi ingane akayazi ukuthi iphi, uyidedelile. Kudlule lapho bathi mangi-khokhe u-r5000.00, ngakwenza lokho ngoba ngithi ngizama ukuthola usizo lwengane.
“Sacinga kwaze kwaphela izinyanga eziwu-6 kwayima itholakala isimathambamhlophe ehlathini. Le ngane bekuwuzinyo bulala,” kubalisa yena.
Ebufakazini obunekwe phambi kwenkantolo kuvela ukuthi umkhize wathumba uhlongwa, wamshaya wambulala, isidumbu sakhe wasithatha nomngani wakhe ujwara, basishisa, bayosilahla epulazini.
Sebeboshiwe nojwara, wafonela umndeni wakhe ewazisa ukuthi ngeke aboshelwe icala angalazi, uzolikhuluma iqiniso. Sebengaphandle, umkhize wamdubula, wambulala naye ngoba edinwa wukuthi uthe uzokhuluma iqiniso mhla bebulala uhlongwa.