Ubonga uninakhulu onengoma ekwitop 10 yokhozi FM
Usaqhubeka nomsebenzi wokwetha uphethiloli ongenisa ngamandla emculweni
INTOKAZI efikayo emculweni, ingoma yayo esohlwini lweziyishumi ezivotelwa ngabalaleli ukwehlukanisa unyaka okhozini FM, yethembisa ukungazikhukhumezi njengoba inyonyobelwa wudumo.
Unosiluleko Nzuza, ozibiza ngoslue endimeni yomculo, usephenduke isilomo ngakubo emooi River namaphethelo ngenxa yengoma esihloko sithi, “Themba Lami” ayicula nomlue Vez nokeke Makhetha, eqoshwe ngaphansi kwedivine Rythm Productions. Le ngoma inesigqi se-afro Dance.
Le ntokazi edabuka elokishini ibruntville, ithi isathukile ngokubona ingoma yayo ithandwa ngabaningi.
Ithi bekungelula ukupheka lo msebenzi ngoba bekumele kuthi uma iphuma emsebenzini, egalaji lapho yetha khona uphethiloli ezimotweni zamakhasimende, iye e-studio iyohlanganisa umculo.
“Njengomuntu okhuliswe ngenhlonipho ngugogo wami umamdunge, ngeke nakancane udumo lungishintshe,” isho.
Ithe ozakwabo emsebenzini kabayithathisi okukasaziwayo, kepha bahlale beyigqugquzela ukufeza iphupho layo lokucula.
Ithi njengoba impilo yayo ingashintsha noma yinini, uma umculo uyihambela kahle, yona ifisa ukushintsha impilo yabantu ngokuthi baphiliswe emoyeni yizingoma ezibhalayo, eziqukethe umyalezo.
Le ntokazi eneminyaka ewu-27, ithi ifisa ukusebenza nabaculi abanjengolira, usjava nobucie, ethi ibukela kakhulu kubona.
Uslue usonge ngokubonga uninakhulu athi ikhono lokucula walincela kuyena, kwazise wayecula eqenjini lendawo le-gospel, ichosen Few.
Ubonge nomasipala wangakubo imooi Mpofana ngokumeseka njengoba kuvotelwa ingoma ezohlukanisa unyaka.
Ungavotela ingoma kaslue ngokuthumela ISMS enohlamvu “D” enombolweni ethi 33665.
* Sezizonke izingoma ezikwi-top 10 yokhozi zimi kanjena:
– DJ Kotin ft Big NUZ, Mshayi & Mr Thela - Hello (A);
– Mthandeni SK Ft Lwah Ndlunkulu - Paris (B);
– Dlala Thukzin ft Zaba & Sykes- Iplan (C);
– Mlue Vez, Slue & Keke Makhetha Themba Lami (D);
– Khuzani ft Luve Umjolo Lowo (E);
– Mellow and Sleazy, Sjavadedeejay, Titom ft Tman Xpress - Imnandi Lento (F);
– Andile Kamajola - Konke (G);
– Harry Cane, Master KG & DJ Latimmy - Dubula (H);
– Dumi Mkokstad Angimbonanga (I);
– K-yos - Ufunani (J)
NGUNOSILULEKO “Slue” Nzuza, ingoma yakhe esohlwini lwezibanga ukwehlukanisa unyaka okhozini.