I-ROYAL AM IZOKWEMUKELA I-BAY FC IGCWELE UKUZETHEMBA
IGCWELE ukuzethemba iroyal AM ngaphambi komdlalo wayo nerichards Bay FC wedstv Premiership ozokuba kusasa ngesonto ngo-15h30 eharry Gwala Stadium, emgungundlovu.
Uzukile Mkhize ongesinye sezitobha ze-am, utshele ILANGA Lempelasonto ukuthi lo mdlalo ufike kahle kubona njengoba imimoya iphezulu kulandela ukuqoqa amaphuzu agcwele kwicape Town Spurs.
Nokho uthi umdlalo wabo nebay uhlale ungowamagqubu kusukela lawa makilabhu esagijima kwinational First Division.
Uthi akakungabazi ukuthi abalandeli abazohambela lo mdlalo bazophuma bebheme bakholwa.
“Okuhle wukuthi sizokuya kulo mdlalo sigcwele ukuzethemba ngoba sibuye namaphuzu agcwele kwispurs,” kusho umkhize.
Usanele Barns ongomunye wabadlali abenza kahle kwibay FC, uthi yize kuwumdlalo onzima lo, kodwa bazimisele ngokubuya namaphuzu agcwele.
Uthi ukuba nzima kwalo mdlalo kufakazelwa nawukuthi kwi-log womabili amakilabhu asendaweni embi njengoba engasemsileni.
“Ngiyazi ukuthi abaningi babuka womabili amakilabhu njengadonsa kanzima, kodwa sifuna ukukujika lokho.
“Umqeqeshi wethu (ukaitano Tembo) ugcizelele ubumqoka bokuba silwe enkundleni kodwa singazifaki ngaphansi kwengcindezi.
“Emdlalweni odlule nestellenbosch FC sivuleke amehlo yize siguqele ekhaya.
“Okuhle wukuthi kuvunguza umoya wobunye ekhempini, sonke siyakuqonda ukuthi kakumele sivume ukudliwa yikilabhu engomkhaya bethu,” kusho ubarns.
Kubadlali okulindeleke ukuba bathwale I-AM kulo mdlalo kukhona uthabo Matlaba, uhugo Nyame ongunozinti, umxolisi Macuphu nosedwyn George.
Kwibay kubhekwe ubarns, usomila Ntsundwana, umoses Mthembu nojustice Figuareido, ukubala nje abambalwa.
Amathikithi alo mdlalo abiza ur80 ewebtickets, epick & Pay, esasol nasebp.