Lisabambe igqubu ibhokisa lasekzn
INGQWELE yaseningizimu Afrika kwimiddleweight, umapule “Thunder” Ngubane isanegqubu ngomphumela wempi yayo norita Mrwebi eyayisemthatha ngo-2022.
Ungubane ukholwa wukuthi wawakhipha wonke amangwevu kodwa amajaji ambamba ngomlenze owodwa ewinisa umrwebi ngoba wayelwa ngakubo.
Ngaleso sikhathi umrwebi wayephethe ibhande likazwelonke le-welterweight. Nokho-ke umapule uthe akafune kwenzelwa ufefe ngamajaji uma esephinda etholana phezulu nomrwebi empini eqhathwe yihlula Dladla Promotions, enamuhla ngomgqibelo e-olive Convention Centre, ethekwini. Iminyango izovulwa ngo-17h00.
Umapule uzothembela ekwesekweni yizindimbane zabalandeli kwazise uzolwa esifundazweni sakhe.
Uthe usophe ukuxina umrwebi zisuka ebhandeni ngoba ufuna ukukhombisa ukuthi akaliphethe ngephutha ibhande leworld Boxing Association (WBA) Pan African.
Leli bhande usanda kulinqoba ngamaphuzu kucharity Mukani Mujwiri wasekenya empini eyayisethe Ridge Casino, emalahleni, empumalanga. Umrwebi uzoya kule mpi enengcindezi yokubuyisa isithunzi.
Empini yakamuva wehlulwe ngumandisa Sibanda wasezimbabwe, ovamise ukusuthiswa isimbambamba ngamabhokisa akuleli.
Uphromotha udladla uthi ukholwa wukuthi umapule uyigugu esibhakeleni sabesifazane kuleli.
Njengamanje igama lakhe likleliswe YIWBA endaweni yesibili eduze kwengqwele uclaressa Shields wasemelika.
Kwenye impi, ulindelani “Bram” Sibisi uhlalelwe wukukhombisa ukuthi kungani abamphethe bembona engufloyd “Money” Mayweather wakuleli.
Lokhu kumele akukhombise ngokuthi angqimuze usange Ngoza wase-eastern Cape empini yebhande elingaphethwe muntu LEWBA Pan African featherweight imizuliswano eyishumi.
Leli yithuba eliyingqayizivele kusibisi lokuthi azakhele igama abuye aqhubeke ebuya nendondo yethusi kumacommonwealth Games ebirmingham, e-england ngo-2021.
Amehlo alabo abangasilandeli kangako isibhakela azothi njo empini yokungcweka phakathi kukabig Zulu nosomabhizinisi wasemgungundlovu uphumlani Njilo.
Ukuklwebhana kwabo esigcawini sabezindaba nasezinkundleni zokuxhumana sekwenze abantu baba magange bayothenga amathikithi. Aqala ku-r150 ukudayiswa, awezicukuthwane abiza u-r800.