Kuchithwe isicelo sebheyili sobhekene nelokubulala umyeni
Kuthiwe kayithembekile inkosikazi yephoyisa elasocongwa futhi isolwa ngokuba ngungqondongqondo etulweni
KUHLWE emini kunkk Faith Ntombela kuchithwa isicelo sakhe sebheyili enkantolo yemantshi yasemlazi ngolwesine abesifake nomnu Sithembiso Khumalo onguthishanhloko wasempulwane Primary School, Kwamaphumulo. Bobabili babhekene necala lokwakha uzungu nokubulala ucapt Thomas Ntombela owayesebenzela amaphoyisa kamasipala wetheku.
Imantshi umnu Zakheni Ngcobo ikhiphe izinqumo ngokwehlukana, yathi ufaith izomphonsa ekhulukuthu, kwathi ukhumalo waphuma ngebheyili ka-r5 000 enemibandela.
Bathathu abasolwa ababhekene naleli cala - ngufaith, yinkabi egwetshelwe elinye icala ebithandana nofaith, ukhumalo, bese kuba yinkabi eyadubula untombela eyalivuma icala yagwetshwa, esiphenduke ufakazi.
Kulindeleke ukuba laba abane abasahamba leli cala bavele kanye kanye ngomhla ka-30 kumasingana (January) bezothola imininingwane ngamacala ababhekene nawo umkhonto ogwaza ekhaya. Phakathi kwamaphuzu avezwe ngummeli wukuthi ufaith usulile emsebenzini, unengane ekhubazekile nokunye okuningi.
Imantshi iwaphendula ngokulandelana la maphuzu, ithe: “Ikhasimende lakho libhekene necala elibucayi futhi yilo elingungqondongqondo kuleli cala, kalisebenzi, (njengoba) lishiye umsebenzi isigubhukane. Lokho nje kuveza ukungethembeki. Lithi belesaba ukuhletshwa emsebenzini.
“Izingane kumanje zihlala nomndeni kamufi, ukuba belinendaba nazo belizolwa kudilike izintaba ukuze lithole ithuba lokuthi libe kanye nazo.”
Ibikusho lokhu ikususela ekutheni kuphele izinyanga ezimbili ufaith engasifaki isicelo sebheyili ngoba ethi udaba lwalulandelwa kakhulu ngabezindaba. Ithi lokhu kuveza ukuthi konke kungaye. Uma engathola ibheyili angalibalekela (icala).
Imantshi iqede lapho yadlulela kukhumalo, yathi iyaneliseka ngesicelo sakhe, izinto anazo ziveza ngokusobala ukuthi ngeke azidele ngenxa yecala.
Isikuqede konke, ibe isikhipha isinqumo sokuthi icala likafaith lizoqulwa engaphakathi, kuthi ukhumalo aphume ngebheyili ka-r5000 enemibandela yokuthi abike kabili ngesonto esiteshini samaphoyisa sakwamaphumulo ngomsombuluko nolwesihlanu phakathi kuka-6 ekuseni kuya ku-6 ntambama.
“Kulindeleke ukuba nibuye kule nkantolo ngomhla ka-30 kumasingana nizothola imininingwane ngamacala enu,” kuphetha imantshi.