Isidumo umfundisi 'enqaba ukushadisa amawele'
Elinye selisonga ngokulanda umnikelo elawukhipha kwakhiwa indlu yebandla
KUSUKE isiphithiphithi kubhuntsha izinhlelo zomshado ngemuva kokuba umfundisi enqabe ukushadisa amawele eshemula, engwavuma, ezeseka ngokuthi inkolo yakhe kayihambisani nokufungisa abantu ababili ngesikhathi esisodwa.
Lo mshabo kamnu Jabulani Gumede nonkk Gugu Gumede (umantimbane) obungomgqibelo odlule bekuhlelwe ukuba ube sendlini yebandla, ihope of Restoration Church, elikuyona le ndawo, wagcina usufudukela emzini wakwagumede.
Lezi zithandani bekufanele zibophe elikasofasilahlane zisizwa ngumnu Bongani Gumede oyiwele likajabulani, nonkk Nompumelelo Gumede (umamlambo) abashade eminyakeni emibili edlule.
Umthombo WELANGA LEMPELASONTO uveze ukuthi isenzo senceku sehlukanise
ibandla phakathi njengoba kunabazalwane abasonge ukubuhoxisa ubulungu babo kulona.
Umkhwenyana utshele leli phephandaba ukuthi kuningi okufike emqondweni wakhe ngemuva kokuba ehlangane nomfundisi ngolwesine, wamazisa ukuthi ngeke awemukele lo mshado endlini yebandla lakhe ngoba kawuhambisana nenkolo yalo.
Uthe lesi simo siholele ekutheni angene ajule ephaketheni ukuze abhekana nezindleko zomcimbi.
“Inkampani ebengiyiqashele ukuba izohlobisa ingitshele ukuthi iyayenyusa imali ngoba isiyohlobisa etendeni kanti besivumelene ngokuthi bazokwenza endlini yesonto.
“Itende lingibize imali elingana nokuthenga inkomo. Ngiphoxekile ngemuva umfundisi engitshela ukuthi ngeke awemukele umshado wami ekubeni sasixoxile, savumelana ngokuthi umshado wami uzohamba kanjani.
“Umfowethu ushade eminyakeni edlule. Kangikwazanga ukuyoma naye ngoba mina bengingenaye umuntu ngaleso sikhathi,” echaza.
Uqhube wathi lesi simo simenze wafikelwa wumcabango wokunxusa inceku ukuba imbuyisele imali ayifakile kwakhiwa le ndlu.
“Iningi imali engiyifakile, nginikela kwakhiwa le ndlu (yebandla) ngoba kuthiwa sizokwazi ukuyisebenzisa sonke.
“Ngigcine sengicabanga ukuthi ngihlale phansi nomkami sibale imali engiyifakile yakhiwa ukuze ezongibuyisela yona yonke ngoba akagcinanga nje ngokungivimba endlini kodwa ubuye wahoxisa namakholwa akhe, ikakhulukazi lawo ebengihlele ukuba azokuba yingxenye yezikhulumi.
“Izikhala zawo ngizivale ngabanye abantu. Nabasizayo ngokupheka ubahoxisile, ngathatha abantu basendaweni, kwaba yibona abaqhuba umsebenzi.
“Ngiphoxekile kakhulu ngoba kudala ngikhonza kuleli bandla futhi kudala nginikela,” kusho ugumede.
Leli phephandaba lizame kaningi ukuxhumana nomnu Joseph Malinga, ongumfundisi waleli bandla, kodwa ucingo lwakhe belukhala, lungabanjwa. Nomyalezo athunyelelwe wona akawuphendulanga.
Usolwazi Sihawu Ngubane, oyisazi samasiko nomlando, uthe kakukho okubi okwenziwe ngumfundisi.
“Inkolo yomfundisi kufanele ihlonishwe. Bathathe isinqumo esihle ngokuthi bafune omunye umfundisi ozohambisana nezifiso zabo.
“Khona kuyinto eyenzekayo ukuthi iwele lenze into eyodwa nelinye ngoba ngumuntu oyedwa lona, kwehlukene imizimba.
“Ingani noma kushone elilodwa iwele kuyaye kuthathwe eliphilayo liyolaliswa egodini lethuna, ngaphambi kokuba kufakwe elishonile.
“Kusukela ekukhuleni kwawo, athengelwa izimpahla ezifanayo ngoba angumuntu oyedwa.
“Nokho-ke kasikwazi ukuthi sithi wusiko okuphoqeleka wonke umuntu ukuba aligcine ngoba kukhona abangahambisani nalo,” kusho ungubane.