Kunxuswa ukuzivikela ezimvuleni ezimbi
Sekukhishwe amathiphu angasiza kulesi simo esesishiye kukhalwa emindenini eminingi
UHULUMENI uqwashisa umphakathi ngokuthi uqaphele njengoba siqhubeka isimo sezulu esibi ezifundazweni ezahlukene, okubalwa kuzona nekwazulu-natal.
Kugqugquzelwa ukuba abantu bazivikele, bakugweme okungababeka engozini.
Esitatimendeni, unkk Nomonde Mnukwa obambe esikhundleni sokhulumela uhulumeni kuzwelonke, uthe isouth African Weather Service (SAWS) isikhiphe izexwayiso zesimo sezulu esibi okubalwa ukuduma kwezulu okunamandla, umoya ongadala umonakalo nezimvula ezingadala umonakalo ewestern Cape, e-eastern Cape, enorthern Cape, Kwazulu-natal, enorth West nasefree State.
Unkk Mnukwa uthi uhulumeni unxusa izakhamizi kulezi zifundazwe ukuba zithathe izinyathelo zokuphepha futhi zilandele imiyalelo evela ezikhungweni eziqaphe izinhlekelele ukuze zihlale ziphephile.
Ngaphandle kwalokho, ukhumbuza ngamasu okuphepha okumele aqashelwe. Kulawa masu kubalulwa ukuthi:Ohamba ngemoto kumele aqaphele kakhulu ebusuku ngoba kuba nzima ukubona okungahle kube yingozi.
- Uma uhamba ngezinyawo, qaphela ukuthi amanzi ahamba kancane angaba yingozi ngesikhathi sezikhukhula. Ungangeni kuwona.
- Gcina amaphepha anemininingwane esemqoka namanye amadokhumenti abalulekile entweni engangeni amanzi.
- Abashayeli bezimoto kufanele baqaphele kakhulu futhi bagweme ukushayela ezindaweni ezigcwele amanzi.
- Umphakathi kumele uqaphe izexwayiso zesimo sezulu emisakazweni nakomabonakude.
- Uma ushayela imoto ungazami ukuwela phezu kwebhuloho uma amanzi egeleza ngaphezu kwalo futhi egeleza ngamandla.
- Makugwenywe ukuwela imifula nemihosha enamanzi.
- Abahlala ezindaweni ezisezansi kumele baqaphele ukwenyuka komthamo wamanzi, basheshe basuke baye endaweni ephephile.
- Mayingasetshenziswa imigwaqo namabhuloho aselinyazwe yizikhukhula - kungcono ukusebenzisa eminye imizila.
- Abazali mabafundise abantwana ngobungozi bezikhukhula.
- Umakhalekhukhwini mawube seduze kanye nezinombolo zezimo eziphuthumayo.
Abantu bakwazulu-natal abadinga usizo oluphuthumayo esikhungweni esiqaphe izinhlekelele bangaxhumana nos. Ngema enombolweni ethi: 066 475 2308. Bangashayela nodkt Elias Sithole kwethi: 082 490 9825 osesikhungweni sezinhlekelele kuzwelonke.