UPHUCWE IMOTO EQALA UKUMPINTSHWA NGOKUZIPHATHA BUDLABHA UNGIZWE
BEKUNGOKOKUQALA kufakwa isikhalo ngokungaziphathi kahle kukangizwe Mchunu enkampanini yezimoto IJAC Motors Port Shepstone, enqamule isivumelwano sokusebenzisana nale nsizwa ezibiza ngomengameli wamabhinca Kwazulu-natal.
Ungizwe - owaxoshwa okhozini FM - ubexhaswe ngemoto yohlobo lweveni yile nkampani. Ngomgqibelo kusabalale inkulumo enohlevane eshiwo ngungizwe lapho abeshiya khona angalazi kumnu Julius Malema ongukhomanda omkhulu WE-EFF.
Phakathi kwamanye amazwi alumelayo ungizwe awashilo, uthe umalema akazi lutho futhi usasebenzisa ulimi lwabacindezeli uma ekhuluma nesizwe.
Uthe kufanele acele kuyena imvume yokuba abantu bakwazulu bahambele umbuthano WE-EFF ozokuba ngonhlolanja (February) emoses Mabhida Stadium, ethekwini.
Lapha I-EFF izokube izokwethula umqulu wezethembiso zokhetho okulindeleke ukuba lubanjwe ngonyaka ozayo.
Ungizwe ugxekwe ezinkundleni zokuxhumana ngabantu abaningi okubalwa kubona nosopolitiki abavela kwamanye amaqembu ezombusazwe nabantu abangezona izishoshovu zepolitiki.
Ngemuva kwalokho ukhiphe isitatimende exolisa ngokungenamibandela.
Ngolwesine ingxenye yabaholi BE-EFF kulesi sifundazwe, inikele emahhovisi ale nkampani iyobika ngokungaziphathi kahle kukangizwe.
Kuthe kungakapheli ngisho nosuku, le nkampani yakhipha isitatimende yazisa isizwe ukuthi seyibunqamulile ubudlelwano ebinabo nongizwe.
Umnu Vincent Bulala oyisikhulu esiphezulu kule nkampani, utshele
ukuthi bekungokokuqala bethola isikhalo ngokuziphatha budlabha kukangizwe.
“Naye ubenolwazi lokuthi uma eke waphula umthetho wokuziphatha, inkontileka inganqanyulwa noma ngabe kunini. Besingeke sihlale singenzi lutho ngoba inkulumo ayishilo inokucwasa ngokobuhlanga.
“Silindele ukuba abuyise imoto yenkampani lungakapheli usuku (ngolwesihlanu). Akaseyona ingxenye yethu. Kuphelile obekusihlanganise naye,” kuphetha ubulala.