Izinkinga zomnotho kubukeka zisazosilandela nango-2024
NJENGOBA siwugoqa kusasa ngesonto unyaka u-2023, sesilindele ngabomvu ukungena konyaka omusha u-2024, ukuze sibone ukuthi usiphatheleni. Kakungabazeki ukuthi sonke silangazelela futhi sinesifiso sokuba u-2024 ube wunyaka ongcono kuno2023, njengoba ube nzima ngendlela eyisimanga. Mhlawumbe isifiso esikhulu sawo wonke umuntu ngesokuba kusimame umnotho wezwe ontengantengayo, kwehle nomthwalo onzima wezindleko zokuphila ukuze sikwazi ukuphefumula nokuphila kangcono.
Nokho iqiniso elibuhlungu wukuthi izinkomba zohlaziyo lwezomnotho kazisitshengisi ukuthi sesingahlala sinethezeke, sibe nethemba eliphelele lokuthi sizophila kangcono ku-2024. Ubunzima esibhekene nabo njengamanje bubukeka sengathi busazoqhubeka. Izinga eliphezulu lezindleko zokuphila nentengo yokudla emba eqolo kubukeka kusazoba yizinkinga esizophila nazo naku-2024.
Onyakeni esiwugoqayo, umnotho waseningizimu Afrika ukhahlamezeke kakhulu ngenxa yezinkinga ezahlukene esingabala kuzo eyokushoda kwamandla kagesi ophehlwa yi-eskom ezweni. Kube nezikhawu eziningi kakhulu zokucishwa kukagesi ngenhloso yokuwonga.
Lo gqamcishi udale umonakalo omkhulu emabhizinisini njengoba amanye ephoqeleke ukuvale thaqa. Ezinye izinkampani zilahlekelwe yinzuzo, zaphoqeleka ukuthatha izinyathelo zokunciphisa izindleko. Kulezo zinyathelo kubalwa nesinqumo sokudiliza izisebenzi okubhebhethekisa izinga eliphezulu labantu abaduve emakhaya ngenxa yokwentuleka kwamathuba emisebenzi kuleli.
Ngokwezibalo zakamuva ezishicilelwe yistats SA emasontweni amabili edlule, engxenyeni yesithathu yonyaka beliwu-31,9% izinga lokusweleka komsebenzi. Umnotho wezwe uphinde wakhahlanyezwa nayizinkinga enkampanini kahulumeni itransnet.
Le nkampani ineqhaza elikhulu emnothweni wezwe njengoba kuyiyona eyengamele ukusebenza emachwebeni awumgomgodla wezohwebo, kanjalo nemizila yezitimela eneqhaza elikhulu kwezohwebo phakathi kweningizimu Afrika namanye amazwe.
Isiphithiphithi sokungahambi komsebenzi ngendlela efanele ikakhulukazi echwebeni lasethekwini ngenxa yokuwohloka kwengqalasizinda, kuwushaye kakhulu umnotho.
Enye inkinga enkulu izwe elibhekene nayo yisimo sezepolitiki esikhombisa ukungabi nalo uzinzo. Ukungabikhona kozinzo kwezepolitiki nakuhulumeni kuyawuphazamisa umnotho wezwe njengoba kwenza nabatshalimali babe manqika ukutshala imali yabo ezweni elinekusasa elibukeka limfiliba - bese lokho kuholela ekutheni umnotho ungasimami ngendlela efanele, nabantu baqhubeke nokuntula umsebenzi.
Zonke lezi zinkinga ezithinta umnotho, zehlela kubathengi abagcina bebhekana nomthwalo onzima wezindleko eziphezulu zokuphila.
Njengoba iningizimu Afrika ibheke okhethweni lukazwelonke ngo-2024, kumele wonke umuntu onelungelo lokuvota asukume abambe iqhaza kulona.
Kumele sikhumbule ukuthi ivoti ngalinye lingawenza umehluko. Indlela esiyovota ngayo mhlawumbe ingalekelela ekutheni izwe liphume kolunye utaku esibhekene nalo.
Sifisela bonke abafundi bethu unyaka omusha onempumelelo nezibusiso. Sibonga ukuseseka kwenu ngisho nasezikhathini ezinzima. Ningadinwa nangomuso.