BAKHALE 'NGOMKHOKHA ONGAVALWANGA' KUFIHLWA UMBONGENI NGEMA
UKHALA ngokudunguza ebumnyameni umndeni wakwangema, emfana, enhlwathi, Kwahlabisa, okuyikhaya elikhulu likambongeni Ngema (ongasekho) njengoba uthi kawutshelwanga lutho mayelana nezinhlelo zokukhumbula nokufihla le ngwazi yemidlalo yeshashalazi engcwatshwe izolo ngolwesihlanu emuva kwenkonzo ebisenkosi Albert Luthuli International Convention Centre, ethekwini.
Ngokwesitatimende esikhishwe ngamalungu alo mndeni azinze enhlwathi, izingwevu zawo zikhala ngokuthi kazazi nokuthi usiko lokumlanda ngehlahla nelokumgeza amanxeba liqhutshiwe yini futhi laqhutshwa ngubani njengoba zishaywe ngesithende.
La malungu azwakalise ukukhathazeka ngendlela okwenzeke ngayo kusaqhutshwa amalungiselelo okufihla le ngwazi njengoba egcine engabanga yingxenye yokumbeka endlini yakhe yokugcina.
Abalise nangokuthi kwenye yezingoma zakhe wakubeka kwacaca ukuthi ufuna ukufihlwa enhlwathi mhla wendela kobandayo. Bathi nayo yonke imicimbi yakhe yesintu ubeyenzela kulona leli khaya elisenhlwathi.
Nakuba le mibiko ibisabalele kodwa unhlanhla Ngema ongumfowabo kamufi - okunguyena okhulumela umndeni - uthe umndeni ugcine ngokuvumelana ngokuthi afihlwe ethekwini ngokulandela okushiwo ngumkakhe, umagumede.
Kubuye kwaputshuka nenye incwadi ebivela kunkz Yolanda Wanda Moncho, ozibize ngenkosikazi kangema ngokwesintu, njengoba ethe kwalethwa izinkomo kubo ediepkloof, esoweto. Le ncwadi uyithumelele undunankulu wakwazulu-natal, unkk Nomusa Dube-ncube, enxusa ukuhlelelwa umhlangano nomndeni wakwangema, efuna nokuba yingxenye yamalungiselelo omngcwabo. Kule ncwadi uwanda uphethe ngokuthi uma isicelo sakhe singaphumeleli, uzobabela enkantolo.
Nakuba bekunalezi zinkulumo kodwa kazikuvimbanga ukuthi le ngwazi ithole umngcwabo osezingeni.
Unhlanhla ekhuluma NELANGA
uthe okwamanje akazimisele ngokuphawula ngezinto ezingahlangene nokufihlwa kukamfowabo.
Uvumile ukuthi nebala bekumele ibe khona inkonzo yesikhumbuzo ngolwesine enhlwathi, kodwa ngenxa yezingqinamba ezibe khona kwagcina kungenzekanga.
Uthe basazohlangana bewumndeni bacabe indlela eya phambili ngokuzokwenzeka kusukela ngemuva komngcwabo.
Unkk Dube-ncube ubonge amagalelo kangema, wathi ubeyiqhawe, esebenzisa ishashalazi ukulwa nobandlululo olwaludla lubi kuleli eminyakeni edlule.
Umnu Zizi Kodwa ongungqongqoshe wezobuciko, amasiko nezemidlalo, uthe ukuba kuya ngaye ngabe kuncipha izinkulumo kuqhakanjiswe imisebenzi kangema.
Amaciko kule nkonzo - iningi lawo okuyilawo asebenze nongema - abefuna kuqhume umculo kunciphe izikhulumi njengoba bekuthi uma kudlala ingoma, asondele eduze kwebhokisi lakhe ebelisongwe ngefulegi lakuleli, okuchaza ukuthi ubengcwatshwa ngokwezinga likahulumeni.
Umnu Thokozani Mncwabe, othe ukhulumela ibandla lakwashembe ngaphandle kokucacisa uhlangothi, uthe ungema ubeyilungu laleli bandla, kanti udlule emhlabeni ekhathazekile ngokuhlukana kwalo.
“Ubekhathazekile ngokuqhubekayo ebandleni njengoba wake wangibiza, wangithuma, okunye engingeke ngikudalule lapha, kodwa ngibatshelile abafowabo ukuthi wayengithumeni,” kusho umncwabe ekhuluma kule nkonzo.
Phakathi kosopolitiki nezikhulu abezithamele le nkonzo kubalwa umnu Jeff Radebe owayengungqongqoshe weminyango eyahlukene kuleli, umnu Bheki Cele ongungqongqoshe wamaphoyisa, udkt Nkosazana Dlamini-zuma, umnu Sbusiso Ndebele owayengundunankulu wesifundazwe nodkt Zweli Mkhize owayengungqongqoshe wezempilo kuleli, unkk Bridget Motsepe, kanti kosaziwayo kubalwa uleleti Khumalo owayeshade nongema eminyakeni edlule, usipho “Hotstix” Mabuse, uhhash’elimhlophe nomkakhe u-ebony Ngcobo, usomizi Mhlongo, ubaby Cele, usello “Chicco” Twala, iladysmith Black Mambazo nabanye.