Ukhozi FM luvusele umlingisi uthando lokusakaza
Ubemenywe ngulady D nosiya Mhlongo ohlelweni lwalesi siteshi
KUVUSE uthando lokuba ngumsakazi ukuba yisimenywa emsakazweni ukhozi FM kumlingisi kamabonakude okhula ngesivinini kulo mkhakha uzamuntu Khoza olingisa indawo kavelephi emdlalweni isibongile and The Dlaminis, okhonjiswa kumzansi Wethu kusukela ngomsombuluko kuya kulwesithathu.
Uzamuntu uzalelwe wakhulela endunduma, eclermont, kanti ubeyisimenywa ohlelweni idankie 1223 obelushayelwa ngududu “Lady D” Khoza nosiya Mhlongo ngaphansi komkhankaso walo msakazo obizwa ngesiyayijika Lento.
Lo mlingisi ube nengxoxo NELANGA
lapho ezwakalise khona ukuthi unalo uthando lokuba ngumsakazi kodwa kakusiyona into ayijahile ngoba usafuna ukukhula kwezokulingisa ngaphambi kokusabalalisa izimpiko zakhe.
UKHUTHAZWE NGABANCOME UBUMTOTI BEPHIMBO LAKHE EMOYENI
“Ngeke ngiqambe amanga, kungijabulisile ukuba yisimenywa kulo msakazo njengoba kuvuse nothando lokusakaza, okuyinto engingathanda ukugcina ngiyenzile ngokuhamba kwesikhathi,” esho.
Le ntokazi ithi okwenze lakhula ngokuphindiwe lolu thando, yizincomo zabantu ezitholile njengoba abanye bencome nephimbo layo emsakazweni.
Uzamuntu uthe nakuba kunjalo ngeke agagamele, ajahe ukwenza izinto eziningi kwazise usanonyaka nje owodwa engenile kulo mkhakha wokulingisa, usazimisele ngokuqhubeka nokuzithuthukisa kuwona.
“Okwamanje ngisafuna ukugxila kakhulu kwezokulingisa ngoba yikhona okusahamba phambili. Okunye ngizokubona ngokuhamba kwesikhathi,” kuchaza le ntokazi eqalayo ukubonakala emdlalweni kamabonakude ngalo mdlalo.
Ithi uthando lwezokulingisa luqale seyifunda esikoleni samabanga aphakeme epinetown Girls, okuyilapho ithathe khona isinqumo sokungena kulo mkhakha.
UZAME KANINGI UKUNGENA EMKHAKHENI WEZOKULINGISA KUNGALUNGI
“Ngemuva kokuphothula umatikuletsheni bengizimisele ngokuyofundela ukulingisa kodwa ngeshwa kwangenzeka njengoba ngimane ngajoyina i-agency okuyilapho ngiqale khona ukuhambela izinhlolokhono zemidlalo kamabonakude,” esho.
Uthe uzame kaningi ukungena kulo mkhakha njengoba ngaphambi kokuthola eyendawo kavelephi wayezama ukudlala enye indawo ehlukile kunayo.
“Ngemuva kwesikhathi ngenze inhlolokhono yenye indawo, ngabizelwa ukuzokwenza ekavelephi okuyiyona engigcine ngiyithola,” esho. Uzamuntu uthi akakholwanga ngesikhathi ethola ucingo lokuthi uyitholile le ndawo kwazise kwase kunesikhathi ezama ukungena kulo mkhakha.
WACABANGA UKUTHI KUDLALWA NGAYE ETHOLA UMSEBENZI WOKUQALA WE-TV
“Ngaqala ngacabanga ukuthi kudlalwa ngami kanti kuyiqiniso,” esho.
Uthi indawo kavelephi uyakuthokozela ukuyidlala ngoba yehlukile kakhulu kunaye. Iyodwa kuphela into engingathi isondelene nami ngendawo kavelephi, wukuthi ungumuntu ongasheshi ukugudluka entweni akholelwa kuyona futhi uyaqinisekisa ukuthi uyayithola into ayifunayo. Ngaphandle kwalokho, singabantu ababili abehlukile kakhulu,” esho.
Uchaze ukudlala le ndawo njengokumnika izingqinamba ngoba ithinta owesifazane obhekene nesimo sokuhlukunyezwa ngowesilisa azwana naye ngenxa yokuthi uyameseka ngasemalini kodwa akamthandi lo mlisa. Uqhube ngokuthi le ndawo kumele ibe yisifundo kubantu besifazane nakubazali ukuthi uma owesilisa ekweseka ngokwemali nokunye, kakusho ukuthi unelungelo lokukuphatha noma yikanjani futhi akwenze wehlelwe nawukuzethemba.
ISIBONGILE AND THE DLAMINIS INGOMUNYE WEMIDLALO ETHANDWA KAKHULU
Uzamuntu unxuse abantu ukuba baqhubeke nokubuka lo mdlalo ngoba kuningi okusazovela ikakhulukazi okuthinta indawo ayidlalayo njengoba kusazoshuba. Lo mdlalo ungomunye wethakaselwa ngabantu njengoba izinombolo zababukeli bawo ziqhubeka nokwenyuka. Uzamuntu uthe uyakuthokozela ukusebenza nabalingisi asebemnkantshubomvu kulo mkhakha ngoba bayamkhuthaza ukuba azimisele ngokuphindiwe ukuze angazitholi esilela ngemuva kubona.