ABE-PARIS 'KABANENDABA' NOKUNGANQOBI OKHOZINI FM
IZOGUJELWA egcekeni lakubo womculi kamaskandi impumelelo yengoma iparis, yomculi kamaskandi umthandeni “igcokama Elisha” Manqele ehluhluwe, emkhanyakude.
Namuhla ngomgqibelo kuhlanganiswe abaculi bemikhakha ehlukene ngenhloso yokweseka umgubho wokubonga ukwenza kahle emakethe kwale ngoma igcokama elipike kuyona ulwah Ndlunkulu.
Le ngoma beyisohlwini lwezingoma eziwu-10 ebeziqhudelanela ukuhlukanisa unyaka emsakazweni ukhozi FM, kusukwa ku-2023 kungenwa ku-2024, kodwa yakhala ngaphansi kwekakhuzani ethi umjolo Lowo.
Kuboshelwe abaculi abaningi okubalwa kubona ujaivazimnike, usminofu, imfezi, ushwi, umtekhala, uthokozani Langa, usgwebo Sentambo, ugadla, usongqongqo, umkhathazi, umdumazi, umgojeli, umjabulisi, AMA-NND, UDJ Tira, uthinah Zungu, UDJ Hlo, uthukzin, ulwah Ndlunkulu nabanye.
Le ngoma eculwa yigcokama nolwah Ndlunkulu, ithandwe kakhulu endimeni yezokungcebeleka njengoba nasezinhlakeni zokulalelwa komculo online kuyoutube, isaqengqeleza yodwa ngokulalelwa ngabantu abawu-12 million njengoba iphume nyakenye.
Imenenja yegcokama umnu Simphiwe Masondo, ithi lo mcimbi ngowokugubha 'ingoma yonyaka' okuyiparis.
“Kasinendaba nokuthi unyaka unqanyulwe ngubani ngokwasemsakazweni omkhulu (ukhozi), thina esikwaziyo nje wukuthi ingoma ebivelele onyakeni odlule futhi ithandwa ngabantu yiparis.
“Yingakho-ke sigubha ukuthi yiyona ingoma yonyaka ehlukanisile kulezi ebeziqhudelana,” kusho umasondo.
Uthe kuningi okuzuzwe yigcokama ngale ngoma okubalwa ukudayisa lafinyelela kwiplatinum. Le ngoma njengoba beyiqhudelana nezinye emncintiswaneni wokhozi FM, ithole amavoti awu-700 000 yalala isibili nakuba beyibhekwe ngabomvu ukuthi izodla ubhedu.
Kulo mcimbi abantu bathenjiswe ukuhlatshelwa izinkomo, bamenyiwe ukuthi bafike ngobuningi njengoba kungenwa mahhala.
Umandla “Shwi” Xaba nomtekhala, bazoshiyelana inkundla okokuqala ngqa emcimbini owodwa selokhu kugqabuke igoda phakathi kwabo eminyakeni edlule.