Ithemba kwethulwa u-r2 wokufakwa kwamanzi
Azodonswa ejozini Dam ukuphakela umphakathi wasemkhanyakude nowasezululand
KULOKOZA inhlasi yethemba ngokunqotshwa kwempi yosizi lokungabi bikho kwamanzi ezingxe nyeni zezifunda ezimbili okungesasemkhanyakude, nesasezululand.
Lokhu kuza ngemuva kokuba ungqongqoshe wezamanzi umnu Senzo Mchunu, ebambe umhlangano nabaholi bemikhandlu emibili ejutshelwe ukubhekana nemisebenzi yokufakelwa kwamanzi emiphakathini abayiholayo.
Lo mholi ubehlangene nomnu Siphile Mdaka oyimeya yasemkhanyakude, umnu Thulasizwe Buthelezi oyimeya yasezululand nezinye izinhlaka zezamanzi okubalwa kuzona inkampani esanda kuhlanganiswa, Umngeniuthukela Water ngolwesithathu, eghost Mountain Inn, emkhuze.
Umchunu umemezele imali ewu-r2 billion yokufakwa kwepayipi elizodonsa amanzi edanyini elikhulu ijozini kuze kube liyofika Kwamandlakazi, Kwanongoma.
Uthe lo msebenzi uzokwenganyelwa yinkampani emenyezelwe Umngeni-uthukela. Unxuse ukuba kubekwe phambili ukubaluleka kokufakelwa kwezakhamizi amanzi.
Okhulumela ungqongqoshe unkz Kamogelo Mokotsi, uthe umchunu wethule le mali ngenhloso yokuba kuqhutshwe umsebenzi obese kunesikhathi waqala ukuhlonzwa.
“Okwamanje bekusewumhlangano wokuqala wokunikezwa kwegunya lokuqalwa kwezinhlelo zomsebenzi wokufakwa kwengqalasizinda yamanzi kulezi zindawo ezibaluliwe.
Lolu wuhlelo oluzosingathwa Umngeni-uthukela Water ngokubambisana namakomidi ahlukene,” esho.
Ekhuluma naleli phephandaba umdaka, uthe ungqongqoshe ufike nesixazululo enkingeni ebhekene nezakhamizi zakulezi zifunda.
“Impela singamaqembu ahlukene (ezepolitiki) kodwa ukuhlangana kwethu kuzothela izithelo ezinhle ngoba thina siwumkhanyakude sikwamukele ukuthi ipayipi lamanzi lidonse edanyini ijozini ekubeni kuyithina esiphethe incwadi egunyaza ukuba sidonse amanzi kulona.
“Sizosebenza ngokubambisana nomasipala izululand ngesizathu sokuthi bafuna into esiyidingayo nathi, okungamanzi. Empeleni amanzi adingwa wumphakathi, kanti omasipala bethu wumsebenzi wabo ukuthi baqinisekise ukuthi imiphakathi ithola amanzi ahlanzekile ngaso sonke isikhathi.
“Sinethemba lokuthi u-r2 billion owethulwe ngungqongqoshe uzokwazi ukuba yisixazululo kulolu sizi olubhekene nemiphakathi yakithi,” kuphetha umdaka.