'YITHINA ESISELE ESIDONSA UDILIKAJELE' - KUBALISA UNINA KA-REEVA STEENKAMP
UNINA kareeva Steenkamp, unkk June Steenkamp, uthi isamququda namanje iminjunju yokubulawa kwendodakazi yakhe ngu-oscar Pistorius.
Unkk Steenkamp usho lokhu esitatimendeni asikhiphe izolo ngolwesihlanu, okuwusuku upistorius akhishwe ngalo ngoshwele ejele ikgosi Mampuru, epretoria.
Uthi yena nomyeni wakhe ubarry ongasekho, selokhu yabulawa indodakazi yabo kabakaze bakwazi ukwamukela isimo sokufa kukareeva noma indlela ashona ngayo.
Ureeva owayeyi-model, wadutshu-lwa wabulawa ngupistorius owa-yeyisoka lakhe ngomhla ka-14 kunhlolanja (February) ngo-2013.
Ejele upistorius uhlale iminyaka cishe ewu-9, eyingxenye yeminyaka ewu-13 ayeyigwetshiwe. Ingxenye esele yesigwebo sakhe uzoyiqedela kubo ngaphansi kwemibandela eqatha yendlela okufanele aziphathe ngayo, okubandakanya kuyo nokuthi kumele angabulokothi utshwala.
Ngolwesihlanu ekuseni umnyango wezokuhlunyeleliswa kwezimilo ukuqinisekisile ukuthi upistorius usesekubo njengoba ededelwe ngoshwele.
Unkk Steenkamp ephawula ngendaba kashwele kapistorius, uthe: “Besilokhu sazi ukuthi ushwele uyingxenye yomthetho waseningizimu Afrika, futhi besilokhu sithi umthetho mawusebenze ngendlela efanele.”
Uqhube wathi ukukhululwa kukapistorius ngoshwele, ngaphansi kwemibandela ethile, kuqinisekise inkolelo yakhe nomyeni wakhe ohlelweni lwezobulungiswa lwaseningizimu Afrika.
Uthi imibandela ebekwe yibhodi ecubungula ngokukhishwa kweziboshwa ngoshwele (parole board), ehlanganisa ukuqeqeshelwa ukulawula intukuthelo nezinhlelo ezithinta udlame olubhekiswe kwabobulili obuthile, (gender based violence), ithumela umyalezo ocacile wokuthi indaba yodlame olubhekiswe kwabobulili obuthile ithathelwa phezulu.
Unkk Steenkamp uphinde waphawula nangokuthi ngabe kwenzekile yini ubulungiswa kureeva, nokuthi ngabe upistorius ugwetshwe isikhathi esanele yini ejele.
“Ngeke kuze kube khona ubulungiswa uma othandekayo wakho engazovuka, futhi kasikho isigwebo esiyobuyisa ureeva. Yithina esisele (esilahlekelwe) esidonsa udilikajele,” kusho unkk Steenkamp.
Isifiso sakhe manje uthe wukuphila ngokuthula, agxile emsebenzini wereeva Rebecca Steenkamp Foundation, ukuze aqhubeke nefagugu likareeva.