Abafundi bexwayiswa ngobungozi bokuvilapha
Abomfundaze kahulumeni babeke ukuphela kwale nyanga ukuvala izicelo zensfas
KUQASHELISWA abafundi ngobungozi bokuhudula izinyawo ekuthumeleni ngesikhathi esifanele izicelo zokuxhaswa ngemali kahulumeni yokufunda ezikhungweni zemfundo ephakeme nezokuqeqeshelwa amakhono ngaphansi kohlelo lwenational Student Financial Aid Scheme (NSFAS).
Ukuvalwa kokuthunyelwa kwezicelo zokwelekelelwa ngemali kwabafundi abazalwa emindenini engenawo amandla okukhokhela amanyuvesi namakolishi imali yokufunda, kuvalwa ngomhla ka-31 kule nyanga.
Okhulumela umnyango wezemfundo ephakeme umnu Ishmael Mnisi, uthi ziningi kakhulu izicelo esezitholakele emnyangweni kodwa banxusa abafundi ukuba baqhubeke nokuthumela.
Utshele leli phephandaba ukuthi ukufaka kwabafundi izicelo ngesikhathi esifanele, kuzosiza zonke izinhlaka zezemfundo ukuthi kungaphazamiseki izinhlelo zokuqala ukufunda nokufundisa phakathi kukanhlolanja (February) nonyaka. Uthi izinxushunxushu ezikhungweni zemfundo ephakeme, zidalwa yizitshudeni ezingazifaki izicelo ngesikhathi esibekiwe futhi ezingazilandeleli izicelo zazo.
“Izisebenzi zakwansfas kaziyanga ngisho emaholidini ngoba bekufanele ziqinisekise ukuthi izicelo zabafundi ziyabhekisiswa, zihlungwe ukuze umsebenzi ubelula. Kuyasikhathaza-ke ukuthi abanye abafundi bazithela ngabandayo bese bekhala ngemizuzu yokugcina ekubeni kungasekho esingakwenza,” esho.
Abafundi abavumeleke ukufaka izicelo zalolu xhaso, yilaba abaqhamuka emindenini enabazali abahola imali engaphansi kuka-r350 000 ngonyaka. Ukuthumela izicelo zokuxhaswa wuhlelo lwensfas, kufuneka ubufakazi obuqinisekisa ukuthi abazali bomfundi kabanawo amandla okukhokhela inyuvesi noma ikolishi ukuze umfundi aqhubeke neziqu zemfundo ephakeme.
Ukuthumela isicelo kwenziwa online ngqo kwansfas ngokungena kule website: www.nsfas.org.za. Abavumeleke ukufaka izicelo ngaphansi kohlelo lwehigher Certificate, befuna ukuqhubeka neziqu zediploma noma idegree - bafaka kabusha izicelo.
Abathathe ikhefu esigabeni sonyaka (semester) noma abanqamule phakathi nonyaka iziqu zabo, kufanele bathumele kabusha izicelo, abadluliselwe emanyuvesi besuka ezikhungweni zokuqeqeshelwa amakhono nabo bathumela kabusha.
Abanqamule uxhaso lwabo lwakwansfas nyakenye ngezizathu zabo ezithile sebefuna ukufunda ngawo (Nsfas) kulo nyaka - nabo bafaka kabusha izicelo. Abafunde nyakenye bengaxhasekile bayalelwa ukuthi bathumele izicelo kulo nyaka.
Uma imininingwane yonke efunekayo itholakele kwifomu yomfundi, uzothola i-email noma i-sms ehambisana ne-reference number. Umfundi obhekana nezinkinga, uxhumana nethimba lakwansfas kule email: info@nsfas.org.za noma ashayele kule nombolo: 080006732.