Hlukanisa izinkolelo-ze neqiniso ngezifo zocansi
Uyakwazi ukufika nesifo endlini ekubeni ungenazo izimpawu zokugula
UNYAKA uqala nje, masizameni ukuwenza kube ngongenazo izifo ikakhulukazi lezi zasekameleni. Lokhu kungasisiza kakhulu ekuvikeleni imiphumela emibi yezifo zangasese.
Namuhla sizoxoxa ngezinkolelo-ze ngezifo ezithelelana ngocansi. Inkolelo-ze ejwayelekile ikakhulukazi ngeyokuthi:
Lapho wenza ucansi nowesifazane osanda ukuya esikhathini kungakwenza uthole izifo ezithelelanayo ngokocansi.
Izifo zocansi zitholakala kuphela lapho wenza ucansi olungaphephile nomuntu onesifo hhayi nomuntu osesikhathini. Ngamanye amazwi kakukho lokhu.
Lapho wenza ucansi nomuntu wesifazane odle idisprin ungangenwa yizifo ezithelelana ngocansi.
Kakusilona iqiniso neze lokhu, izifo ezithelelana ngocansi zenziwa kuphela wukuya ocansini nomuntu ovele esenaso lesi sifo.
Kulula ukubona umuntu onesifo esithelelana ngocansi, ngoba uba ne-discharge.
Siyazi ukuthi i-discharge ingaba ngenye yezimpawu zokuba nezifo ezithelelana ngocansi kodwa lokhu kakusho ukuthi uzohlale une-discharge lapho unalezi zifo. Kanti futhi uyakwazi ukuba nesifo socansi kodwa ungenayo i-discharge.
I-drop iyaziphelela lapho uyiyeka, ungayelaphi.
Lapho uzibona une-drop kubalulekile ukuya kudokotela uyothola usizo wena nowakwakho ukuze ungatholi izinkinga zalezi zifo. Kubalulekile ukuthola ukwelashwa.
Obe nezimpawu nguyena olethe isifo.
Siyazi ukuthi kunabantu abathelela abanye ekubeni kubona zingabonakali izimpawu zaso.
Ungathola izifo zocansi ngokusebenzisa indlu yangasese.
Okudabukisayo wukuthi abantu abaningi bayakholelwa ngempela kulokhu. Lezi zifo zibizwa ngokuthi ngezocansi ngoba zidluliseleka ngenkonzo yocansi. Okokuzithola endlini yangasese kakusiyona into ejwayelekile.
Ucansi lomlomo luphephile, ngeke uthole izifo zocansi uma wenza le nkonzo.
Zonke izinhlobo zocansi olungaphephile zingakufaka engozini yezifo ezithelelanayo. Ngakho kubalulekile ukucabanga ukuphepha ngaphambi kwenjabulo.
Lubalulekile usizo lwezempilo uma nisola ukuthi ninesifo socansi.
Sonke isikhathi uma usola ukuthi wena noma owakwakho unesifo esithelelana ngocansi, kubalulekile ukuba nithole usizo lwezempilo. Futhi lapho senikhetha ukuqala ukwenza ucansi olungaphephile, khumbula ukubaluleka kokuhlola izifo ezithelelana ngocansi ngaphambi kokuba nilwenze (ucansi).
• Ngesonto elizayo sizoke sichushisane ngokuthi yini ucansi oluphephile. * Uyatholakala nasezinkundleni zokuxhumana ngala madilesi:instagram: @the.blue.clinic Instagram: @the_blue_clinic