EZEMALI: NOSIBONISO MTSHALI

UKUQALA konyaka yilapho abantu behlela izinto ezintsha abafisa ukuzenza njengokufunda, ukonga imali, ukuthola umsebenzi, ukushadelwa noma ukujima nokudla ukudla okunempilo. Konke lokhu kungezinye zezinto abantu abazihlelayo njalo uma kuqala unyaka.

Nokho kwabanye kufika isikhathi sephasika sebekhohliwe ukuthi babezibophezele ngani futhi sebebuyele emikhubeni yabo emidala. Kulo nyaka kumele sike sibheke izinto okumele siyeke ukuzenza, yize abantu abaningi behlele izinto abafisa ukuzenza nokuzizuza kodwa singalibali wukubheka izinto okumele siziyeke ikakhulukazi uma zisilimaza emalini.

WUKUNTULEKA KWAMATHUBA EMISEBENZI OKUFAKA ABANINGI EKUGEMBULENI

Ngike ngenza ucwaningo olufushane ezinkundleni zokuxhumana (short survey) mayelana nemiphumela yokugembula. Umbuzo ububheka ukuthi ikhona yini impumelelo ekugembuleni njengoba sekusabalele kangaka ngenxa yobuchwepheshe bamafoni kodwa izimpendulo zikhombise ukuthi ngaphambi kokuba sibheke impumelelo nokumosheka kwemali kubantu abagembulayo, kumele sibheke ukuthi yini lena ebaholela ekuphanteni.

Omunye ophawulile ubalule ukwesweleka kwamathuba emisebenzi okwenza abantu abaningi abasha bazame impilo kulezi zinto zokugembula okuthinta ezemidlalo eyahlukene, amagemu afana ne-aviator nokunye okuningi abantu abakuzamayo.

ABANYE BACWILA KAKHULU BEZAMA UKUBUYISA IMALI ESUKE SEYIBALAHLEKELE

Ngokusho kwezimpendulo eziningi, bonke bathi uma usaqala ukugembula uyawina bese kwenyuka amathemba okuthi kuzohamba kahle kodwa ngokuhamba kwesikhathi ubone ukuthi seyidliwe yonke le mali obuyiwinile futhi sekungenele nasemalini yakho. Okulandelayo yimizamo yakho yokuthi ubuyise le mali esilahlekile ngokuthi ugembule kakhulu lapho ogcina usudayisa impahla ukuze uthole imali yokuphanta.

Kwesinye isikhathi abanye bangena ezikweletini ngakho njalo ukuthi bazama ukubuyisa le mali ebalahlekele. Kugcina sekuwumkhuba okungelula ukuwuyeka ngoba usungenile egazini okwenza ulahlekelwe ngeningi imali.

IQINISO LITHI OKUGENJULWA KUBONA BAYOHLEZI BEZUZA KUNABAGEMBULI

Bakhona abaphendule bakhombisa ukuthi okwamanje izinto zisabahambela kahle futhi baziphilisa ngakho ukugembula ngokwemidlalo yebhola ngoba bayalazi futhi bayalitadisha kakhulu. Ukwanda kobuchwepheshe bokugembula ngezemidlalo kwenza abantu abaningi bazame imali kulezi zinkundla zokuphanta kodwa abantu abaningi uma bebheka imiphumela yonyaka wonke bayabona ukuthi badliwe.

Kwabanye sekunzima ukuwuyeka lo mkhuba wokugembula ngoba iqiniso lithi indlu (casino/ gambling platforms) iyohlezi iphumelela. Omunye wabafundi uthi isihlobo sakhe sesidlelwe imoto ngenxa yawo lo mkhuba. Kweminye imizi kubhidlika ngisho nemishado imbala uma omunye esegaxele kulo mkhuba.

KUHLE UKUZAMA USIZO LOKUPHUMA KULO NOXHAKA UMA SEWUKUBAMBILE

Kulapho kubalulekile ukuthi uthole usizo uma ubona ukuthi kakusayekeki ngoba bambalwa abantu abakwazi ukuzibamba nokuzilawula. Ngingakhuthaza umuntu obhekene nenkinga yokuhluleka ukuzilawula uma sekuza ngasekugembuleni ukuba acele usizo enhlanganweni ebizwa ngesa Responsible Gambling Foundation noma inational Council on Problem Gambling nakwezinye izinhlangano ezisizayo uma usubhekene nale nkinga. Kulolu cwaningo olufushane ebesilwenza, abantu abaningi bakhombisa ukuthi kuningi ukulahlekelwa yimali ekugembuleni. Lo mkhuba kumele kube ngomunye yaleyo oyigwemayo kulo nyaka uma ufuna ukubona impumelelo emalini.

• Usiboniso Mtshali ungusomabhizinisi ongumeluleki wezindaba zemali osemthethweni (FSP49257), ogunyaziwe ukusiza abasezikweletini (NCRDC3326), ukudayisa nokuthengiswa kwemizi (FFC: 1197883) nokwakha izindlu (NHBRC3000286136). Email: admin@moneyrepublic.co.za. Whatsapp: 076 810 0953.