KUVELA ELOMHLATHI KWABE-SABC NGEMIDLALO YE-AFCON
I-SABC ikhiphe abathandi bakanobhutshuzwayo baseningizimu Afrika osizini inqoba impi yokukhombisa i-2023 Africa Cup of Nations (Afcon) ezoqala mhla ka-13 kwephezulu isongwe mhla ka-11 kunhlolanja (February) e-ivory Coast.
Kulindeleke ukuba yonke imidlalo ye-afcon iboniswe eziteshini ZESABC engumsakazeli womphakathi wakuleli.
Njengoba isizini yepremier Soccer League (PSL) isathathe ikhefu lamasonto awu-6 ngenxa yeafcon, bekunovalo ngendlala yebhola kubathandi balo mdlalo kuleli njengoba isupersport TV iphumele obala ukuthi ngeke iwusakaze lo mqhudelwano.
I-SABC Sport iveze ukuthi ithole igunya lokusakaza imidlalo ewu-52 yalo mqhudelwano ovikelwa yisenegal eyawunqoba ecameroon ihlula i-egypt sekukhahlelwa amaphenathi kowamanqamu.
Ibafana Bafana izobe ibambe iqhaza kulo mqhudelwano eyawunqoba ngo-1996.
I-SABC Sport ithole negunya lokubonisa bukhoma imidlalo ewu150 yokuhlungela i-afcon yango2025, ewu-32 yecaf CHAN 2024, eyecaf Champions League yangale sizini ka-2023/24, imidlalo yecaf Confederations Cup, eyecaf Africa Women Cup of Nations 2024, eyecaf Women’s Champions League 2024 neyecaf Super Cup 2024.
Leli gunya lizoqeda isikhalo ebesesijwayelekile kwabebhola kuleli ngokuthi bancishwa ithuba lokubuka imidlalo emqoka uma linikwe isupersport TV njengoba ikhokhelwa zinyanga zonke.
I-SABC izosakaza bukhoma nemidlalo yecaf eziteshini zayo zemisakazo okubalwa kuzona iradio 2000, Umhlobo Wenene FM, Ukhozi FM, ilesedi FM, imotsweding FM, ithobela FM, iphalaphala FM, imunghana Lonene FM, Ikwekwezi FM, iligwalagwala FM NETRUFM - ngolimi lwabalaleli.
Oyisikhulu esiphezulu sezokusebenza KWASABC, u-ian Plaatjes uthe: “Ithimba LESABC lijabule ngokuthi yonke le midlalo emikhulu izotholakala emphakathini waseningizimu Afrika futhi lithanda ukudlulisa ukubonga kubanikazi bamalungelo, inew World Media nabo bonke ababambe iqhaza.
“Sibonga nopatrice Motsepe ongumengameli wecaf osebenze ngokuzikhandla ukuqinisekisa ukuthi lolu hlelo luyaphumelela.”