Ujabulela ithuba lokwenza okwehlukile owebucs
Kunokuthile azama ukukufunda kubadlali "bakhe"
UBONA ithuba lokwenza into eyehlukile ujose Riveiro ongumqeqeshi weorlando Pirates, oqokwe ukulolonga iqembu elakhiwe ngabadlali abehlukene.
Istellenbosch FC eyizingqwele zecarling Black Label Knockout, izobhekana necarling All Stars XI namuhla ngomgqibelo ngo15h00 epeter Mokaba Stadium, epolokwane.
Uriveiro nguyena obashaye emakhanda abaqeqeshi BEPSL njengoba evotelwe kakhulu ukuba ahole i-all Stars.
Ekhuluma nabezindaba lo mqeqeshi, uthe ubona leli kuyithuba lokufunda into entsha njengoba engakaze abhekane nayo phambilini.
“Kimina yithuba lokufunda into entsha futhi eyehlukile, ngifunde nendlela eyehlukile yokujimisa abadlali abagijima emakilabhini ehlukene, abeza nezabo izitayela zokudlala. Ngiyazama nami ukufunda okuthile kulaba badlali ngoba wumdlalo omqoka lona esiya kuwona.
“Ngizama ngawo wonke amandla ukuthi kufike isikhathi somdlalo sebeyiqonda kahle indlela engifuna badlale ngayo. Nginethemba lokuthi emuva kwemizuzu ewu90, sizobe singabanqobi,” kusho uriveiro.
Uthe uyababonga kakhulu abalandeli ngokumkhetha eningini labaqeqeshi, lokho kusho lukhulu kuyena.
“Lokhu kukhombisa ukuthi kukhona okuhle engifike nakho ebholeni lakuleli. Wumsebenzi omqoka lo abanginike wona.
“Ngizoqinisekisa ukuthi nami ngenza umsebenzi oncomekayo.
"Lapha kangizimele nje mina kuphela, ngimele nethimba labaqeqeshi engisebenza nalo, bese ngimela nekilabhu enkulu, i-orlando Pirates,” kusho uriveiro.
Uthe bafana nencwadi evalekile kwistellies.
“Okusivunayo ngalo mdlalo wukuthi thina siyabazi, bona kabasazi. Ekugcineni kosuku, umdlalo kufanele ugijinywe futhi sikuqinisekise ukuthi siyawunqoba,” kusho uriveiro.