UGODONGWANA NETHEMBA LOKUYONXENXA ABATSHALIMALI
INETHEMBA lokunxenxa abatshalimali iningizimu Afrika engqungqutheleni eqavile yezomnotho yamazwe ebizwa ngeworld Economic Forum (WEF), eyenzelwa edavos, eswitzerland.
Iningizimu Afrika engelinye lamazwe azoba yingxenye YEWEF ezoqala ngomsombuluko esiya kuwona womhla ka-15 kuze kube wulwesihlanu ziwu-19, imatasa namalungiselelo okugcina okuyoqhakambisa elakuleli kule ngqungquthela ukuze inxenxe abatshalimali.
Ngolwesihlanu ekuseni ungqongqoshe wezemali umnu Enoch Godongwana (osesithombeni), ubehlangene nabomkhakha wezamabhizinisi abazobe besethimbeni lakuleli eliyokwethamela IWEF.
Ugodongwana uthe lo mhlangano abe nawo nabasemkhakheni wamabhizinisi futhi abawuthatha njengomqoka, ubanike ithuba lokuhlanganisa amehlo, kubunjwe umyalezo ofanayo ngeningizimu Afrika, abazohamba bewuphethe kule ngqungquthela.
Enkulumeni yakhe nosomabhizinisi, uthe kungenzeka kube nokungaboni ngasolinye ngokunye okuthinta inqubomgomo yezwe (yezomnotho), kodwa kubalulekile ukuthi uma kufikwa edavos, kukhulunywe ngazwi linye.
Utshele osomabhizinisi ukuthi umnyango wakhe ngokubambisana nowezokuxhumana nobuchwepheshe bedijithali, owezempilo, owezemfundo ephakeme nesayensi, owezohwebo nezimboni kanye nokuncintisana; okagesi; kanye ne-brandsa, sebelungiselele umqulu wemibiko ebalulekile (key messages document) uhulumeni nabamabhizinisi abangawusebenzisa njengomhlahlandlela abazosebenzela phezu kwawo ezingxoxweni kwiwef.
Kulo mhlangano wangolwesihlanu umnu Godongwana ukubeke kwacaca ukuthi ivangeli elimqoka kakhulu okumele lishunyayelwe edavos, ngelokuthi iningizimu Afrika isazivulile izandla kubatshalimali abafuna ukusebenza nayo.
“Njengohulumeni, sisazimisele ukubhekana nezinselelo zezamandla nezinselelo zezokuthutha (logistics) ezinomthelela omubi emnothweni wethu,” kusho ugodongwana.
Uthi bazokugcizelela ukuthi iningizimu Afrika iseyisango lokungena e-afrika - bakhuthaze abatshalimali bamazwe ukuba batshale imali e-afrika naseningizimu Afrika.