UPHENYO LUZOQHUBEKA SISEKHEFINI ISIKHULU ESINUKWA NGENKOHLAKALO
UNQUME ukudedela uphenyo ukuba luqhubeke engekho emsebenzini usihlalo webhodi lenational Student Financial Aid Scheme (NSFAS), umnu Ernest Khosa (osesithombeni) osemanzini abilayo ngezinsolo zenkohlakalo okuthinteka kuyona negama likangqongqoshe wezemfundo ephakeme udkt Blade Nzimande.
Ukhosa uthathe ikhefu lezinsuku eziwu-30 ukuze ibhodi icubungule kahle izinsolo ezibhekiswe kuyena engekho ngaphakathi emsebenzini.
Lezi zinsolo zithi ukhosa nonzimande, bahlomula imali eshisiwe ezinkampanini ezinikwe yilesi sikhwama umsebenzi wokufakela izitshudeni imali yalolu xhaso emanyuvesi nasemakolishi.
Inhlangano emele ukuxhashazwa kwemali yabakhokhi bentela i-organisation Undoing Tax Abuse (OUTA), yathi igodle ubufakazi bezinkulumo eziqoshiwe zomhlangano owawuphakathi kukakhosa nezinkampani ezihlomulisa yena nonzimande.
Umbiko okhishwe YI-OUTA, uthi ukhosa nonzimande bathola amantshontsho kulezi zinkampani ukuze kuqhubeke ubudlelwano bazo nalesi sikhwama.
Kuvela ukuthi lezi zinkampani zisolwa ngokukhokhela lezi zikhulu, zibonga ukunikwa kwazo ithenda nokugcina umsebenzi wazo uphephile kulesi sikhwama, ungapheli.
Okhulumela umnyango wezemfundo ephakeme umnu Ishmael Mnisi, uthi bekunomhlangano webhodi ngolwesithathu okuyilapho usihlalo efake isaziso sokuthi uzothatha ikhefu.
Uthi ukuthatha kwakhe ikhefu kakuchazi ukuthi uvuma izinsolo ezibhekiswe kuyena.
Ukhosa utshele ibhodi ukuthi akakaze ahlomule lutho ekuzinothiseni yena noma ukusebenzela ungqongqoshe unzimande ngasese.
Ibhodi ikhathazekile nangezinsongo ezibhekiswe kusihlalo nomndeni wakhe ngalesi simo.
Ngokwesitatimende SENSFAS, ibhodi izoqoka ezomthetho ezizobhekana nalolu daba, zilethe kulona umbiko otholakele ngezinsolo.
Lokhu kubekelwe izinsuku eziwu30. Ibhodi ithi iqinisekisa iningizimu Afrika ukuthi lolu daba luzophathwa ngobunyoninco nokwethembeka.
Ithi izomemezela maduzane nesikhulu esisha esiphezulu emuva kokuba obeqhwakele umnu Andile Nongogo akhonjwa indlela ngezinsolo zenkohlakalo.
Isicelo sakhe sokubuyiselwa emsebenzini sichithww enkantolo ngolwezi (November) nonyakenye.
•Bheka nasekhasini 14.