I-IFP IKHATHAZEKILE NGENTENGO EMBA EQOLO YOMFANISWANO
USOTSWEBHU omkhulu WEIFP esishayamthetho Kwazulunatal, unkk Thembeni Madlopha-mthethwa, ophinde abe ngumkhulumeli weqembu esifundazweni kwezemfundo, uthi bakhathazekile beyiqembu ngokumba eqolo kwentengo yomfaniswano wesikole.
Ukukhathazeka kwayo I-IFP ithi kulandela isikhalo sabazali abaningi sokuthi baphoqeleke ukuba bakhokhe intengo emba eqolo yomfaniswano ngenxa yokuthi izikole zenza izivumelwano nabathile abahlinzeka ngomfaniswano, okanye imifaniswano idayiswe kuphela ezikoleni.
Uthi indaba yokuthi kube ngabathengisi abathile abakhethekile abanegunya lokuthengisa ngomfaniswano wesikole idala ukukhathazeka kwi-ifp.
Uqhube wathi kabahambisani nalezi zinkontileka zabakhethekileyo ezihlala zivuselelwa.
Banxusa ukuba uhlelo lokukhishwa komsebenzi wokuhlinzeka ngomfaniswano nokuqokwa kwenkampani ezowuhlinzeka kube yinto eyenziwa ngokuvulelekile.
“Inqubomgomo esetshenziswa yizikole eziningi njengamanje kayihambisani nomthetho wokuncintisana futhi iyisithiyo kubahlinzeki abafuna ukungena emakethe,” esho.
Uthi okwenzekayo kuphambene nenqubo yomfaniswano wesikole
okumele kuhanjiswe ngayo, eyakhishwa wumnyango wezemfundo eyisisekelo ngo-2015.
Uthi umhlahlandlela kazwelonke womfaniswano wesikole kwakuhloswe ngawo ukunqanda ukuthi kungabi nendlela eyodwa okutholakala ngayo umfaniswano.
“Abantu abaningi bathembele ezibonelelweni zikahulumeni kodwa uma ubheka intengo yomfaniswano wesikole, ingaphezulu kwezibonelelo zikahulumeni ezitholwa ngabantu.
“Lokhu kubangela ukuba izingane eziningi ziye esikoleni zingazifakile izicathulo ngoba abazali bakwazi ukuthenga izinto ezimbalwa kuphela.
“Kuphinde kuholele ekutheni
izingane eziningi zingayi esikoleni ngoba zingenayo imifaniswano yesikole.
“Lokhu kunomthelela omubi kubantu abahlala ezindaweni zasemakhaya ngoba bayaphoqeleka ukuthi bahambe amabanga amade beyothenga imifaniswano yesikole emadolobheni lapho utholakala khona.
“Imifaniswano yesikole kumele itholakale ezitolo eziseduze nalapho kuhlala khona abantu,” kusho unkk Madlophamthethwa.
Uphethe ngokuthi I-IFP iyasemukela isimemezelo sekhomishini yezokuncintisana sokuthi izoshushisa izikole ezingayilandeli imigomo yomfaniswano wesikole.