BASOLA UHULUMENI NGOKUNTENGA KWEMBONI YEZOKUVAKASHA KULELI
Bakhala ngamanzi, ugesi, imigwaqo nezokuphepha ngokungenyuki kwezibalo zezivakashi
KUSHAYISANA imibono ngemibiko yesikhashana esaphumile mayelana nokwenza kahle komkhakha wezokuvakasha ngesikhathi samaholide okuphela konyaka.
Ngokusho kwenhlangano eyengamele izindawo zokuvakasha Kwazulu-natal, ifedhasa, kakuhambanga kahle kulo mkhakha njengoba izibalo abasazitholile zidumaza.
Ngakolunye uhlangothi, uhlaka olwengamele ezokuvakasha kulesi sifundazwe, itourism Kwazulunatal, luveze ukuthi ngokwezibalo ezisaphumile, zibanika ithemba lokuthi lo mkhakha wenze kangconywana ngalesi sikhathi.
Ubrett Tangay owengamele ifedhasa ezifundazweni ezisogwini, uthe kuyadumaza ukuthi njalo kwenziwa izibalo kusaqhathaniswa nonyaka odlule.
Uthe empeleni izibalo okumele ngabe ziyabhekwa manje yilezo ezandulela isikhathi sokhuvethe.
“Isifike yadlula icovid, ngakho sekumele siqhathanise neminyaka efana no-2019 ukuthi kwakunjani kulo mkhakha ukuze sibone ukuthi senza kahle noma sisami ezikhathini zaleli gciwane.
“Okubuhlungu wukuthi izibalo ezazikhona ngo-2019, kasikafinyeleli kuzona kanti ngokubona kwethu, lokhu kusazothatha isikhathi,” kusho utangay.
Uthe nakuba ikhona inhlasi yethemba kodwa uhulumeni unomthelela wokuthi lo mkhakha ungabuyeli ezikhathini ezandulela i-covid.
“Uma ubheka izinkinga ezifana namanzi, imigwaqo, ezokuphepha nogesi zibe nawo umthelela wokuthi singenyuki ngendlela okufanele engabe sinyuka ngayo,” esho.
Uthe ngokwabo ezokuvakasha kazenzanga kahle nakuba ITKZN ithi kube khona ukwenyuka kodwa kakusho lutho uma belikhona ithuba lokwenza kangcono. Uthe nabo ekupheleni kwenyanga bazokhipha ezabo izibalo eziqondile ezizoveza okuyikho ngalo mkhakha.
Ngakolunye uhlangothi, isikhulu esiphezulu esibambile KWITKZN, umnu Sibusiso Gumbi, sibalule isimo sezulu ebesingesihle njengeminye yemithelela wokwehla kwesibalo sabantu abahambele amabhishi ngesikhathi samaholide.
Lokhu kulandela ukuphuma kwemibiko yesikhashana yokwenza kwesifundazwe kwezokuvakasha ngesikhathi samaholide okuphela konyaka.
Ugumbi uthi nakuba benethemba lokuthi umbiko ogcwele ozophuma ekupheleni kwale nyanga - uzokhipha izibalo ezibavunayo, kodwa ngokwezibalo abasazitholile kubukeka lesi sifundazwe senze kangconywana kunalokhu obekulindelekile.
Uvumile ukuthi amabhishi akulesi sifundazwe kawagcwalanga ngendlela abebelindele ngayo ngenxa yesimo sezulu.
Uthe okubanika ithemba wukuthi lesi sifundazwe kasigabile ngamabhishi kuphela njengoba ziningi izindawo nezinto izivakashi ezingazithokozisa ngazo uma zivakashele lesi sifundazwe.
Uthe izindawo ezigudle izintaba zokhahlamba ziqhubekile nokwenza kahle ngesikhathi samaholide.
“Izintaba zokhahlamba yizona esingathi zihambe phambili ngalesi sikhathi kodwa kuzocaca kahle uma sekuphume umbiko wezibalo ogcwele ekupheleni kwale nyanga,” esho.
Ugumbi uthe okwamanje basathole izibalo zokuthi ezokuvakasha esifundazweni zenyuke ngamaphesenti amabili uma kuqhathaniswa nangonyaka odlule.
Uchaze amaholide kakhisimusi noncibijane njengabe nesibalo esiphezulu ngamaphesenti amane uma kuqhathaniswa nangonyaka odlule.
Phambilini leli phephandaba labika ukuthi umnyango wezokuvakasha kulesi sifundazwe uzibekele isibalo sezivakashi eziwu845 000 ngesikhathi samaholide.
Bekubhekwe ukuthi eziwu-52 000 kube yilezo eziqhamuka phesheya kwezilwandle.
Ugumbi uthe bahlalele ethembeni lokuthi bakwazile ukufinyelela kulesi sibalo futhi basedlula, nakuba zikhona izingqinamba ebezikhona ezifana nesimo sezulu.