Liyamchuma ibhizinisi lamathawula 'anomlingo'
Unesifiso sokungenisa emahhotela nasezindaweni zokulala
UKWESABA ukubalwa nabantu ababhuquza neziqu emakhaya nokuzalwa emndenini okhuthaza amabhizinisi kwenza intokazi yasemanzimtoti, eningizimu yetheku, ukuba isungule ibhizinisi.
Unkz Nonjabulo Miya ungumsunguli weluxurious Towels, yasemanzimtoti, eningizimu yetheku, eyenza amathawula ahlotshisiwe.
Uthi phakathi kwezinto ezenza waqala leli bhizinisi esafunda edurban Institute of Technology (DUT), wukuthi wabona ukuthi amathuba omsebenzi ayindlala, wafuna ukuqeda izifundo zakhe esenento azoyenza ngesikhathi esafuna umsebenzi.
Okunye okutshale uthando lwebhizinisi kuyena wukukhulela emndenini okhuthaza ukuzimela nogqugquzela amabhizinisi.
UKHULE EDAYISA USWIDI ESIKOLENI, ENZA NOBUHLALU, ABUDAYISE
“Ngisesemabangeni amancane namakhulu ngangidayisa uswidi esikoleni, ngenza nobuhlalu, ngibudayise. Konke lokho kwenze ngafisa ukugcina nginebhizinisi elithi mina uma sengimdala, nangempela kwenzeka,” esho.
Unkz Miya unepublic Administration yasedut, ayiphothula ngo-2021, okuwunyaka aqala ngawo inkampani yamathawula. Uthi bavamise ukuthatha izinsuku eziyisikhombisa ukwenza umsebenzi wekhasimende bawuqede.
Baqala ku-r140 ukwenza ithawula no-r550 kuya ku-r750 amathathu.
“Ngaqala ibhizinisi ngo-r600 engathenga ngawo engangikudinga ukuliqala, nakhona kwakungelula ukuthola abantu abazongenzela umsebenzi ngendlela engifisa ngayo, kodwa kwagcina kulungile ngokuhamba kwesikhathi,” esho.
UNGENISE KAKHULU EBANDLENI LAMANAZARETHA AKHONZA KULONA
“Kwadingeka ukuba ngizihluphe ngocwaningo lokwenza ibhizinisi lami lichume, ngafunda ukuzenzela umsebenzi kanti manje sengisebenzisana nezisebenzi eziyisihlanu
ukusiza ukuphuthumisa umkhiqizo.
“Okwamanje ngingenise (ebandleni) lamanazaretha engikhonza kulona. Engikhonza nabo bangeseka kakhulu ngokuthenga kanti sinokuthola namakhasimende korichards Bay, emgungundlovu, ekapa nasempumalanga,” esho. Izinsuku kazifani. Nakunkz Miya kunjalo. Kuyenzeka kube nendlala yamakhasimende, kubuye kube ngconywana. Uhleka yedwa uma kuphela unyaka ngenxa yokuthi uvame ukuthola amakhasimende ezinkampanini zifuna amathawula ayizipho.
USEBENZISA IZINKUNDLA ZOKUXHUMANA UKUHEHA AMAKHASIMENDE
Iluxurious Towels inemfihlo yokukhangisa umsebenzi wayo. Uthi: “Sisizwa kakhulu wukusebenzisa izinkundla zokuxhumana ukuheha amakhasimende ngenxa yendlela esikhangisa ngayo ibhizinisi lethu.
“Nakuba ngingajahile ukuchuma ngokushesha, kodwa isifiso sami esikhulu wukugcina ngingenisa emahhotela nasezindaweni zokulala,” kusho unkz Miya ngezinhlelo zangomuso zebhizinisi.
* Lolu daba luqale lwashicilelwa ku: www.umbele.co.za
Facebook: luxurious_towels Instagram: luxurious_towels