SIBOLELWA WUKUDLA EMAFRIJINI NGALO GESI OHAMBA AMASOLOKOHLO
MHLELI: Kunabantu abazalwa bembethe kulo mhlaba esiphila kuwona, abalandelwa yinhlanhla bezihlalele emizini yabo kumbe emakubo.
Phakathi kwabantu abanale nhlanhla esiyifisayo sonke kuleli, kubalwa nomnu Kgosientsho David “Sputla” Ramokgopa (osesithombeni) owagixabezwa ngesikhundla sokuba ngungqongqoshe kagesi kuleli.
Lesi sikhundla wasinikwa ngumengameli Cyril Ramaphosa ukuba azoxazulula inkinga yokunqamuka kukagesi ebhekene nelakuleli.
Selokhu engenile kulesi sikhundla uramokgopa, kangiyiboni nje into aseyenzile, eyehlukile kobekwenzeka engakafiki ngoba namanje le nkinga isalikhungethe elakuleli, futhi kakubukeki nje ukuthi izoxazululeka maduzane.
Le ndoda ngithi inenhlanhla nje, yingoba uma unikwa umsebenzi ngokujwayelekile - uyaye unqunyelwe isikhathi sokuthi izinyawo zakho zizogcwala udaka uma wehluleka ukuyilungisa leyo nkinga emuva kwesikhathi esingakanani.
Uma-ke lokhu kungenzekanga siyaye sithi usuke ugidelwe yidlozi.
Phela ukuthi ugesi sicinyelwa wona isikhathi esingakanani kakumthinti nakancane lo mlisa njengoba thina emlazi kwenzeka ukuthi (ugesi) uhambe usuku lonke.
Le nkinga kayikhungethe leli lokishi kuphela ngoba nginabangani abahlala eklaarwater nakwandengezi abakhala esifanayo.
Lokhu kakusishiyi nje sisebumnyameni kuphela ebusuku, kubolisa ukudla kwethu okusemafrijini, kubulale nezinto zethu eziningi ezisebenza ngogesi.
Uma usuke wazi ukuthi ugesi uzohamba amahora amabili njengoba kujwayelekile ikakhulukazi ezindaweni ezihlala abamhlophe, ungalikhipha ne-fridge uma usola ukuthi ukubuya ngamandla kukagesi kuyalilimaza, ulokhele mhlawumbe emuva kwemizuzu emibili ugesi ubuyile, uphinde ulikhumule uma sekusondele ukuba uhambe.
Inkinga kula malokishi engikhuluma ngawo wukuthi nathi kasisazi ukuthi empeleni ugesi uhamba ngasiphi isikhathi, uphinde ubuye ngasiphi futhi.
Okwethu kuhambisana ngqo naleli hlaya elizungeza ezinkundleni zokuxhumana, elithi ngisho ugesi ungahamba isikhathi eside kangakanani, nxa ubuya kawubuzi nokuthi kungani unyamalale isikhathi eside, ujabulela khona nje ukuthi sewubuyile, uzame ukupheka ngokushesha noku-ayina izinto ezimqoka.
Siyafisa sengathi le nkinga kungatholakala abantu abanolwazi lwangempela lukagesi, baqashwe ukuzosiza, kuthi nosopolitiki, okuvela ukuthi yibona abadala yonke le nyakanyaka esikuyona ngokugxambukela befuna ukuba imibengo egangile yamathenda okuhanjiswa kwamalahle inikwe abangani babo, bayixege kancane inkampani yase-eskom ukuze ikwazi ukuphefumula, isiphakele kahle ugesi.
Kungenjalo, ngibona kuza impi yendlala kuleli lapho uquqaba luzokube lufelwe yizinto ezisebenza ngogesi, lungenayo imali yokuthenga ezintsha njengoba imisebenzi igqoza, kunendlala ngoba ingekho imali yokuthenga ukudla kwansuku zonke, okungaholela kulolu thuthuva lwangontulikazi (July) wango-2021 kutatshwa izimpahla ezitolo okuyinto engingayifisi ukuphinda ngiyibone.