Iswallows ihlela ukuxosha ukomphela nabadlali
Ihlawuliswe kanzima ngokwehluleka ukuhambela imidlalo
KUHLUKANA inhloko nesixhanti phakathi kukasteve “Mphathi” Komphela nemoroka Swallows ehaqwe yizinkinga zemali kwidstv Premiership. ILANGA Lempelasonto lihoshe ngemithombo yalo ukuthi iswallows ihlela ukuligqabula ifindo lomshado phakathi kwayo nomqeqeshi wayo, ukomphela.
Le kilabhu isematheni kubathandi bebhola njengoba ihluleke wukuya emidlalweni emibili yeligi ngozibandlela (December) okungowemamelodi Sundowns nowelamontville Golden Arrows. Isizathu salokho kube wukuteleka kwabadlali bayo abebekhala ngamaholo. Ikomiti leligi eliqondisa ubugwegwe, liyihlawulise kanzima iswallows ngolwesine ngalesi senzo. Igingqelwe kuyona yomibili imidlalo amaphuzu anikwa idowns ne-arrows ngokwahlukana kanye namagoli amathathu umdlalo ngamunye.
Ihlawuliswe no-r1 million kodwa yayalelwa ukukhokha u-r400 000, u-r600 000 walengiswa izinyanga eziwu-24 ingatholakali necala elifanayo.
Ixwayiswe ngokuthi kungenzeka ikhishwe kwiligi uma kungaphinde kwenzeke isigameko esifanayo.
Izinyoni zivele zasikhiphela kubadlali isibhongo njengoba bonke abathintekayo zibabizele ekomitini eliqondisa ubugwegwe.
Amacala angene izolo ngolwesihlanu.
Leli phephandaba lihoshe ngemithombo yalo ukuthi usihlalo weswallows, udavid Mogashoa, uhlela ukuyihlela kabusha ikilabhu yakhe.
“Okuvelayo wukuthi abaphathi beswallows bahlela ukubakhomba indlela bonke abadlali abathinteka esitelekeni njengoba ibasola ngokuba ngokhanda limtshelokwakhe. Abanye bazicelela bona amaphepha abakhululayo, kabasathandi ukuba yingxenye yale kilabhu.
“Abaphathi bahlela ukuletha abadlali abasha abasebancane, abazoqhubeka nabo kuze kuphele isizini. Okumangalisayo wukuthi abaphathi bahlela nokudedela ukomphela, bamsola ngokuveza amahlazo ekilabhu esidlangalaleni,” kusho umthombo.
Iphunzile imizamo yokuthola umogashoa njengoba ucingo lwakhe belukhala kodwa lungabanjwa.