Ibanjiwe imiphumela 'yabakopelile' ka-matric
Undunankulu uthe uhlelo lokumaka yilona oluzocacisa izinto
KUTHATHWE isinqumo sokubanjwa kwemiphumela yabasolwa ngokukopela ngesikhathi kubhalwa izivivinyo zikamatikuletsheni ngonyaka odlule. Ungqongqoshe wezemfundo eyisisekelo, unkk Angie Motshekga, uveze lokhu ekhuluma ngemiphumela kamatikuletsheni yakulo nyaka. Uthi imiphumela yophenyo yiyona ezocacisa.
Balinganiselwa ku-900 abaphenywayo, abawu-700 bakwazulunatal, kuthi esifundazweni impumalanga babe wu-164.
Unkk Motshekga uthe lezi zinsolo kaziyiphazamisanga imiphumela kazwelonke ngoba uhlaka oluqinisekisa izingabunjalo bemiphumela umalusi, ligunyazile ukuthi idedelwe.
Ngokuthola kwaleli phephandaba, esinye sezikole esithintekayo kulokhu, singaphansi kwesifunda uthukela, okhahlamba. Kulesi sikole kubhale abawu-120, kwadedelwa imiphumela yabafundi abathathu.
“Muhle kakhulu umsebenzi owenziwe ngabantwana, ukuzimisela kwabo kubonakele. Ngiyafisa ukuthi kuqhubeke njalo ukuzimisela,” kusho unkk Motshekga.
Ekhuluma emcimbini wesifundazwe wokukonyeliswa kwabafundi abaphase kahle, uncome imfundo kazwelonke ngeqhaza layo kwezemfundo.
Uthi eminyakeni yama-1960s, izwe belinabantu abangakwazi ngisho ukusayina. Uthi ngalowo nyaka wu-10% ku-phela wabantu abebefundile.
“Njengamanje sesisebenze kahle kakhulu. Ngonyaka ka-2021 sikwazile ukukhiqiza u-60% wesizukulwane sabazali esikwaziyo manje ukuzisayinela amafomu, akusafani naseminyakeni edlule lapho khona umzali ebesayinelwa,” esho.
Uthi lesi sifundazwe siphonse umnikelo omkhulu kuzwelonke. Uveze ukuthi yisona negauteng esikhiqize abafundi abaningi abaphase ngamabachelor.
Ungqongqoshe wezemfundo esifundazweni, unkk Mbali Frazer, uthe konke okuhle okwenzeke kulo nyaka kungenxa yothisha abasebenze ngokuzimisela.
“Ngesikhathi kumakwa amaphepha, bengibatshela othisha ukuthi mabaqinisekise ukuthi kawenzeki amaphutha,” esho.
Undunankulu wesifundazwe, unkk Nomusa Dube-ncube, uthe uhlelo lokumakwa kwamaphepha luzocacisa ngabasolwa kulokhu. Uthi izihloko ezigqamile ngalolu daba zibeka okungesikhona.
Abafundi abawu-11 abamele isifundazwe ngokuphasa kahle, baklonyeliswe ngezitifiketi ezihambisana nemali ewu-r10 000.